Jayasimhakalpadruma 10.p2

10.p2

nvitam | sitavastrayugacchannaṃ sitacandanacarcitam | nānābhakṣyasamopetaṃ sahiraṇyaṃ svaśaktitaḥ | tāmrapātraṃ guḍopetaṃ tasyopari niveśayet | tadabhāve kathāḥ kuryātkāmakeśavayornaraḥ | kāmanāmnā harerarcā snāpayedguḍavāriṇā | śuklapuṣpākṣatatilairarcayenmadhusūdanam | kāmāya pādau saṃpūjya jaṅghe saubhāgyadāya ca | ūrū smarāyeti punarmanmathāyeti vai kaṭim | svacchodarāyetyudaramanaṅgāyetyuro hareḥ | mukhaṃ padmamukhāyeti bāhū pañcaśarāya vai | namaḥ sarvātmane maulimarcayediti keśavam | evaṃ jāgaraṇaṃ kṛtvā śuklamālyāmbaro vratī | tataḥ prabhāte taṃ kumbhaṃ brāhmaṇāya nivedayet | brāhmaṇānbhojayedbhaktyā svayaṃ bhuñjīta bandhubhiḥ | bhuktvā tu dakṣiṇāṃ dadyādimaṃ mantramudīrayet | prīyatāmatra bhagavānkāmarūpī janārdanaḥ | hṛdaye sarvabhūtānāṃ ya ānando'bhidhīyate | anena vidhinā sarvaṃ māsi māsi samācaret | upavāsī trayodaśyāmarcayedviṣṇumavyayam | phalamekaṃ ca saṃprāśya dvādaśyāṃ bhūtale svapet | tatastrayodaśe māsi ghṛtadhenusamanvitam | śayyāṃ dadyādvijendrāyasarvāpaskarasaṃyutām | kāñcanaṃ kāmadevaṃ ca śuklāṃ gāṃ ca payasvinīm | vāsobhirdvijadāmpatyaṃ pūjya śaktyā vibhūṣaṇaiḥ| sarvaṃ śayyādikaṃ dattvā prīyatāmityudīrayet| homaṃ śuklatilaiḥkuryātkāmanāmāni kīrtayet | gavyena sarpiṣā tadvatpāyasena ca dharmavit | viprebhyo bhojanaṃ dadyādvittaśāṭhyaṃ vivarjayet|ikṣudaṇḍāṃśca yo dadyātpuṣpamālāṃ svaśaktitaḥ|yaḥkuryādvidhinānena madanadvādaśīmimām | sarvapāpavinirmuktaḥ prāpnoti harisāmyatām | iha loke varānputrānsaubhāgyaṃ sukhamaśnute | yaḥ smaraḥ sa smṛto viṣṇurānandātmā maheśvaraḥ | sukhārthī kāmarūpeṇa yajettaṃ jagadīśvaram | tacchrutvā ca cacārāsau ditiḥ sarvamaśeṣataḥ| kaśyapo vratamāhātmyādāgatya parayā mudā | varairācchādayāmāsa sā tu vavre sutaṃ varam | tataḥ sā vratamāhātmyāllebhe garbhamanuttamam | kadācillabdhasaṃcāraḥ śatrutvājjaṭhare diteḥ | praviśyaikonapañcāśatkṛtvā krodhājjaghāna tam | tāvanto bālakā bhūtā rurudurna mṛrti gatāḥ | tato vai cintayāmāsa kimetaditi vṛtrahā | dharmasya kasya māhātmyātpunaḥ saṃjīvitāstvamī | kadācidanayā nūnaṃ madanadvādaśī kṛtā | tatprabhāveṇa jīvanti tanayā nihatā api | nūnametatpariṇatamadhunā tattu pūjanam | vajreṇābhihatāḥ santo na vināśamavāpnuyuḥ | eko'pyanekatāmāpa yaddharbho nihato'pyalam | aho māhātmyametasminmadanadvādaśīvrate | jīvatputrā bahusutā yena nārī prajāyate |' iti matsyapurāṇoktaṃ madanadvādaśīvratam | damanakāropaṇakṛtyaṃ tu ekādaśyāmadhivāsanasya kartavyatayā caitraśuklaikādaśīprakaraṇa evoktam