Jayasimhakalpadruma 11.p14
Jayasīṃhakalpadruma 11.p14
- Language
- Sanskrit
11.p14.1
yairiyaṃ na kṛtā kalau | sarvamaṅgalaśīlā ca sarvāśubhavināśinī | bhuktimuktipradā caiṣā satyaṃ satyaṃ varānane | śrīdevyuvāca- 'kathaṃ yāmyapuraṃ mārgaṃ tyaktvaiśaivaṃ vrajennaraḥ | etanme mahadāścaryaṃ pratyayaṃ kuru śaṃkara |' śrīśaṃkara uvāca- 'śṛṇu devi yathā vṛttāṃ kathāṃ paurāṇikīṃ śubhām | yamaśāsanahantrīṃ ca śivaśāsanadāyikām | kaścidāsītpurā kalpe niṣādastvāmiṣapriyaḥ | pratyantadeśavāsī ca bhūdharāsannabhūcaraḥ | sīmānte sa sadā tiṣṭhetkuṭumbaparipālakaḥ | tanvā pīno dhanurdhārī śyāmāṅgaḥ kṛṣṇakañcukaḥ | baddhagodhāṅgulitrāṇaḥ sadaiva mṛgayārataḥ | evaṃvidho niṣādo'sau caturdaśyāṃ dinodaye | svadravyārthaṃ vaṇigbhiśca devāgāre nirodhitaḥ | tenāpi devatā dṛṣṭā janānāṃ vacanaṃ śrutam | upavāsaratānāṃ ca jalpatāṃ he śiveti ca | dinānte sa tadā muktaḥ prātardravyaṃ pradīyatām | tato'sau dhanura his/her/rādāya dakṣiṇena gataḥ svayam | jagāma sa vanoddeśaṃ janahāsaṃ cakāra saḥ | śivaḥ śivaḥ kimetadvai vadanti nagare janāḥ | vanecarānnirīkṣansa caturdikṣu itastataḥ | padaṃ ca padamārgaṃ ca mṛgaśūkaracittalān | dhāvatastasya sarvāsu dikṣu vai lubdhacetasaḥ | vanaṃ saparrvataṃ sarvaṃ bhramatastu dinaṃ gatam | aprāptā eva gacchanti sakalā mṛgajātayaḥ | saṃprāptamapi nāpaśyaṃ na mṛgaṃ na ca cittalam | nirāśo lubdhako yāvattāvadastaṃgato raviḥ | cintayitvā jalopānte jāgaraṃ mṛgaghātanam | saṃvidhāsyāmyahaṃ rātrau niścitaṃ mama jīvanam | taḍāgasaṃnidhau gatvā tattīre jālimadhyataḥ | nilayaṃ kartumārabdhamātmārthaṃ guptikāraṇam | jālimadhye mahāliṅgamasti svāyaṃbhuvaṃ śubham |
11.p14.2
tato bilvasya patrāṇi troṭitvā mārgaśodhane | kṣiptāni dakṣiṇe bhāge liṅgamūrtigatāni vai | na divā bhojanaṃ jātaṃ saṃrodhasya prabhāvataḥ | mṛgānnirikṣatastasya nidrānāśo'pyajāyata | jālimadhyagatasyāpi prathamaḥ praharo gataḥ | tato jalārthamāyātā hariṇī garbhasaṃyutā | yauvanasthā surūpā ca stanapīnāṅgaśobhitā | nirīkṣantī diśaḥ sarvā utphullanayanā bhṛśam | lubdhakenātha sā dṛṣṭā bāṇagocaratāṃ gatā | kṛtaṃ ca bāṇasaṃdhānaṃ tenaikāgreṇa cetasā | troṭitvā bilvapatrāṇi prakṣiptāni śivopari | smarañchiveti vādaṃ ca śītena paripīḍitaḥ | bilvamadhye sthito dṛṣṭo hariṇyā lubdhakastadā | lubdhakaḥ sa svarūpeṇa kṛtānta iva tiṣṭhati | dṛṣṭvā ca tasya saṃdhānaṃ yamadaṃṣṭrāsamaprabham | sā mṛgī divyayā vācā lubdhakaṃ vākyamabravīt |' mṛgyuvāca | 'sthiro bhava mahāvyādha sarvajīvanikṛntana | kimarthaṃ māṃ haniṣyasi kathayasva mama prabho | tasyāstadvacanaṃ śrutvā lubdhakaḥ prāha tāṃ mṛgīm | samātṛkaṃ kuṭumbaṃ me kṣudhayāpīḍyate bhṛśam | dhanaṃ ca madgṛhe nāsti tatastvāṃ hanmi śobhane |' sūta uvāca - 'jātapūjāprabhāveṇa jāgaropoṣaṇena ca | caturthīśena pāpānāṃ vimukto lubdhakastadā | vismayotphullanayano mṛgīvākyena pārvati | uvāca vacanaṃ tāṃ vai dharmayuktamasaṃśayam | mayā hi ghātitā devi uttamādhamamadhyamāḥ | na śrutā tvīdṛśī vāṇī śvāpadānāṃ kadācana | kasmindeśetvamutpannākasmātsthānādihāgatā| kathaya tvaṃ prayatnena paraṃ kautūhalaṃ hi me |' mṛgyuvāca - 'śṛṇu tvaṃ lubdhakaśreṣṭha kathayāmi tavākhilam | āsaṃ pūrvamahaṃ rambhā svarge śakrasya cāpsarāḥ |
11.p14.3
anantarūpalāvaṇyasaubhāgyena ca garvitā | saubhāgyamadasaṃyukto dānavo madagarvitaḥ | mayaiva sa kṛto bhartā hiraṇyākṣo mahāsuraḥ | tena sārdhaṃ ciraṃ kālaṃ mayā bhuktaṃ yathepsitam | anyasmindivase vyādha krīḍantyā meḍasureṇa ca | gato bahutiyaḥ kālo mahādevasya kopakṛt | pratyahaṃ prekṣaṇaṃ nṛtyaṃ śaṃkarasyāyatañca me | yāvadgacchāmyahaṃ tatra tāvadrudro'bravītkrudhā | he rambhe ka gatāsi tvaṃ kena vā saṃgatā śubhe | saubhāgyamadagarveṇa nāgatā mama mandiram | satyaṃ kathaya śīghraṃ tvaṃ no cecchāpaṃ dadāmi te | śāpabhītyā mayā tatra satyamuktaṃ śivāyataḥ | śṛṇudevapravakṣyāmi śāpānugrahakāraka | mama bhartā samaḥ prāṇairdānavo baladarpitaḥ | tena sārdhaṃ mayā deva krīḍitaṃ nijamandire | tasya bhogena lubdhāhaṃ śayanādeva notthitā | tenāhaṃ nāgatā śīghraṃ sṛṣṭisaṃhārakāraka | rudrastadvacanaṃ śrutvā sakopo vākyamabravīt | mṛgaḥ kāmāturo nityaṃ hiraṇyākṣo bhaviṣyati | tvaṃ mṛgī tasya bhāryā vai bhaviṣyasi na saṃśayaḥ | yasmāttyaktvā svarga devāndānavaṃ bhoktumicchasi | tasmāttu nirjale deśe tṛṇāhārā bhaviṣyasi | dvādaśābdāni bhadraṃ te bhavitā śāpa eṣa vām | parasya ca hi śokena śāpānto hi bhaviṣyati | kṛtastvanugraho vyādha śaṃkareṇa yadṛcchayā | yadā kaścidvyādhavaro mama sāṃnidhyamāśritaḥ | bāṇāgre tasya saṃprāptā pūrvajanma smariṣyasi | śaṃkarasya tadā rūpaṃ dṛṣṭvā mokṣamavāpsyasi | śaṃkaro na mayā dṛṣṭo vasantyāsminmahāvane | tena duḥkhamanuprāptā medomāṃsavivarjitā | garbhākrāntā viśeṣeṇa avadhyā ceti niścitam | sakuṭumbasya te nūnaṃ bhojanaṃ na bhaviṣyati |
11.p14.4
āyāsyati mṛgī tvanyā bahumāṃsamadoddhatā | bhojanaṃ sakudumbasya tayā nūnaṃ bhaviṣyati | atha vānyau mṛgo vyādha tava bāṇasya gocare | prabhāte'tikṣudhārtasya niścayādāgamiṣyati | muktā'tha vyādha garbha vā bālānādiśya bandhuṣu | śapathairāgāmaṣyāmi saṃdiśya ca sakhījanam | tasyāstadvacanaṃ śrutvā vyādho vismitamānasaḥ | kaṣṭamevaṃ tadā dhyātvā tāṃ provāca mṛgāṅganām | nāgamiṣyasi yadyanyo mṛgastvamapi gacchasi | kṣudhayā pīḍito'haṃ vai kuṭumbaṃ ca bhaviṣyati | prātastvayā mama gṛhamāgantavyaṃ yathā bhavet | vraja tvaṃ śapathānkṛtvā yathā me niścayobhavet | pṛthivīvāyurādityaḥ satyetiṣṭhantidevatāḥ | pālanīyaṃ yathā satyaṃ lokadvayamabhīpsubhiḥ | tasya tadvacanaṃ śrutvā sā garbhāryā tadā mṛgī | cakre satyapratijñāṃ vai vyādhasyāgre punaḥ punaḥ |' mṛgyuvāca-'dvijo bhūtvā tu yo vyādha vedabhraṣṭo'bhijāyate | svādhyāyasaṃdhyārahitaḥsatyaśaucavivarjitaḥ | avikreyasya vikretā ayājyānāṃ ca yājakaḥ| tena pāpena limpāmi nāgacchāmi punaryadi|dhūrte duṣṭe śaṭhe yacca yatpāpaṃ mānakūṭake | vedavikrayake cāpi śavasūtakabhojane | vañcake ca viśīle ca paradārarate tathā | mṛtaśayyāgrāhake ca mātāpitrorapoṣake | dānaṃ dātuṃ prasaktasya yo'ntarāyakaro naraḥ | tena pāpena limpāmi nāgacchāmi punaryadi | svadattāṃ paradattāṃ vā yo haretsāgarāmbarām | devadravyaṃ gurudravyaṃ brahmadravyaṃ tathā haret | tena pāpena limpāmi nāgacchāmi punaryadi | devatāṃ svāminaṃ mitramātmānaṃ bālameva ca | gāṃ ca vipraṃ guruṃ nārīṃ vyāpādayati durmatiḥ | tena pāpena limpāmi nāgacchāmi punaryadi |
11.p14.5
dānasya kīrtane pāpaṃ yatpāpaṃ dāmbhike tathā | asaṃyatendriye nityaṃ paradoṣānukīrtane | kṛtaghne ca kadarye ca nāstike vedanindake|sadācāravihīne ca parapīḍāpradāyake | parapaiśunyayukte'pi kanyāvikrayakārake | parāpavādasaṃtuṣṭe sarvadharmabahiṣkṛte | vṛṣalīpatau ca yatpāpaṃ pitrośca garadāyini | haituke bakavṛttau ca śrāddhatīrthavivarjite | eteṣāṃ pātakaṃ mahyaṃ nāgacchāmi punaryadi | yatpāpaṃ brahmahatyāyāṃ pitṛmātṛvadhe tathā | yatpāpaṃ lubdhakānāṃ ca gocoraviṣaghātinām | tena pāpena limpāmi nāgacchāmi punaryadi | dvibhāryaḥ puruṣo yastu samadṛṣṭayā na paśyati | yaścānhale balīvardāmbiṣamānvāhayennaraḥ | tenapāpena limpāmi nāgacchāmi punaryadi| sakṛddattvā tu yaḥ kanyāṃ dvitīye dātumicchati | yasya vyabhicāriṇī bhāryā brāhmaṇī ca viśeṣataḥ | ekākī miṣṭamaśnāti bhāryāputravivarjitaḥ | ātmajāṃ guṇasaṃpannāṃ samāne sadṛśe vare | na dadāti ca yaḥ kanyāṃ naro vai jñānadurbalaḥ | tena pāpena limpāmi nāgacchāmi punaryadi | mṛgīvākyaṃ tataḥ śrutvā lubdhako hṛṣṭamānasaḥ | mumoca hariṇīṃ sadyo muktabāṇaṃ dhanustataḥ | tasyā muktiprabhāveṇa liṅgārcanakareṇa ca | sa pātakacaturthāṃśānmukto'sau tatkṣaṇādapi | dvitīye prahare prāpte hyartharātre varānane | smarañchivāṃśivākyaṃ na nidrāṃ labdhavāṃstadā | dvitīyātha tataḥ prāptā kāmārtā mṛgasundarī | saṃtrastā bhayasaṃvignā patimanveṣatī tadā | jālimadhye sthitenātha dṛṣṭā sā lubdhakena ca | punarbilvasyapatrāṇi troṭitānikareṇa tu | kṣiptāni dakṣiṇe bhāge liṅgasyopari pārvati | tasyā vadhārthaṃ vyādho hi bāṇaṃ dhanuṣi saṃdadhe |
11.p14.6
harṣapūrṇena manasā kuṭumbārthaṃ bhṛśaṃ priye | nirīkṣyalubdhako yāvattasyāṃ bāṇaṃ vimuñcati| tāvanmṛgī susaṃtrastā vyādhaṃ vacanamabravīt | dhanurdhara śṛṇu vyādha sarvasattvabhayaṃkara | dehi me vacanaṃ hyekaṃ paścānmāṃ vinipātaya|āgatā hariṇī caikā mārgeṇānena lubdhaka | samāyātātha vā naiva satyaṃ kathaya suvrata | tadvaco lubdhakaḥ śrutvā vismitastatkṣaṇādabhūt | tasyāstu yādṛśī vāṇī amuṣyā api tādṛśī | saiveyamāgatā nūnaṃ pratijñāpālanāya vai | atha vā'nyā samāyātā tayā yā kathitā purā | evaṃ saṃcintya manasā lubdhako vākyamabravīt | śṛṇu tvaṃ mṛgi me vākyaṃ gatā sā nijamandiram|tvaṃ dattā mama nūnaṃ hi sā bhavetsatyavāgapi | ahorātraṃkṛtaṃkaṣṭaṃ kuṭumbārthaṃ mṛgāṅgane | adhunā tvāṃ haniṣyāmi devatāsmaraṇaṃ kuru | vyādhoktaṃ vacanaṃ śrutvā hariṇī duḥkhitā bhṛśam | vyādhaṃ prāha ruditvā sā mā māṃ vyādhanipātaya | nāstimāṃsaṃ tathā medaḥ śarīrerudhiraṃmama | tejo balaṃ me sakalaṃ nirdagdhaṃvirahāgninā | ahaṃ prāṇairviyokṣyāmi bhojanaṃ te na jāyate | balavānsumahātejā medomāṃsapariplutaḥ | atyantapṛthūpīnāṅgomṛgohyatrāgamiṣyati|taṃ hatvāsukhabhāgī tvaṃ tṛptaścaiva bhaviṣyasi | tayokte lubdhakaḥ śrutvā kiṃ karomītyacintayat | mṛgī brūte hyasaṃdigdhaṃ niścayo'yaṃ paraṃ mama | cintayitveti saṃprāha mṛgīṃ kāmāturāṃ tadā | kuru pratijñāṃ satyāṃ tvaṃ niścayo me yathā bhavet | tadvyādhavacanaṃ śrutvā mṛgī śokasamākulā |
11.p14.7
satyāṃ pratijñāṃ vidadhe vyādhasyāgre punaḥ punaḥ |'mṛgyuvāca-'kṣatriyasturagaṃdṛṣṭvā saṃgrāmādyonivartate |tena pāpena limpāmi yadyetadanṛtaṃ vade|paradravyaratā nityaṃ māyāvanto'pyasūyakāḥ| bhedayanti taḍāgāni vāpīnāṃ ca gavāmapi | mārgasthānaṃ ca ye ghnanti sarvasattvabhayaṃkarāḥ | parityajanti sanmārgānpaśūnbhṛtyāṃstathaiva ca | brāhmaṇāṃnnindate yaśca tathaivāśramanindakaḥ | tena pāpena limpāmi yadyetadanṛtaṃ vade | ākarṇyetthaṃ vacastena muktā sā tatkṣaṇātpriye | jalaṃ pītvā gatā sāpi adṛṣṭaḥ so'bhavattadā | jālimadhye sthitasyāpi dvitīyaḥ praharo gataḥ | pīḍitastīvraśītena kṣudhayā paripīḍitaḥ | śivaṃ śivaṃ prajalpanvaina nidrāmupalabdhavān | kṛtaṃ śivārcanaṃ tena tṛtīye prahare'pi ca | vīkṣate sa diśaḥ sarvā jīvanārthaṃ varānane | saubhāgyabaladarpāndhyo mṛgastāvatsamāgataḥ | bāṇaṃ gṛhītvā taṃ dṛṣṭvā maurvyāmāśu nyayojayat | ākarṇāntaṃ dhanarnamya hṛṣṭastuṣṭena cetasā | yāvanmuñcati bāṇaṃ sa tāvaddṛṣṭo mṛgeṇa vai | kālarūpaṃ tu taṃ dṛṣṭvā mṛgaścintāṃ parāṃ yayau | niścitaṃ bhavitā mṛtyuryadi pādo vicālyate | bhāryā prāṇasamā caiva vyādhenaiva nipātitā | tayā virahitasyāpi mama mṛtyurbhaviṣyati | hā kālavikṛtaṃ pāpaṃ yadbhāryāduḥkhamāgatam | na hi bhāryāsamaṃ saukhyaṃ vipine'pi gṛhe'pi vā | tayā vinā na dharmo hi nārthaḥ kāmo viśeṣataḥ | vṛkṣamūle'pi dayitā yatra tiṣṭhati tadgṛham | prāsādo'pi tayā hīnaḥ kāntārādatiricyate | dharmārthakāmakāryeṣu puṃsāṃ bhāryā sahāyinī | videśagamanenaiva saiva viśvāsakāriṇī | nāsti bhāryāṃsamo bandhurnāsti bhāryāsamaṃ sukham |
11.p14.8
nāsti bhāryāsamaṃ loke narasyārtasya bheṣajam | yasya bhāryā gṛhe nāsti sādhvī ca priyavādinī | araṇyaṃ tena gantavyaṃ yathāraṇyaṃ tathā gṛham | tayā vinā jīvato'pi niṣphalaṃ mama jīvitam | ekā prāṇasamā me'bhūdvitīyā prāṇadā mama | tābhyāṃ virahitasyādya niṣphalaṃ jīvitaṃ mama | evaṃ saṃcintya śanairlubdhakaṃ vākyamabravīt| śṛṇuvyādhamahāsattva āmiṣāhāraniścaya | tvāṃ hi pṛcchāmi kiṃcidvai satyaṃ kathaya me sphuṭam | āyātaṃhariṇoyugmaṃ kenamārgeṇatadgatam | tvayā vināśitaṃ naivaṃ satyaṃ kathaya me'grataḥ | tasya tadvacanaṃ śrutvā lubdhako'pi vyacintayat | asāvapi na sāmānyo devatā kāpi vidyate | dhyātveti satyaṃ tasyāgre lubdhako vākyamabravīt | te gate'nena mārgeṇa pratijñāya mamāgrataḥ | tābhyāṃ datto bhojanārthaṃ mama tvaṃ nātra saṃśayaḥ | adhunā tvāṃ haniṣyāmi na hi mokṣyāmi karhicit | vyādhoktaṃ hi vacaḥ śrutvā hariṇaḥ prāha satvaram | tatsatyaṃ kīdṛśaṃ vyādha tābhyāmuktaṃ tavāgrataḥ | yena te pratyayo jātastanmuktaṃ hariṇīdvayam | vyādhena kathitāḥ sarve ye kṛtāḥ śapathāḥ purā | tasya tadvacanaṃ śrutvā hariṇo hṛṣṭamānasaḥ | vyādhaṃ prāha tataḥ śīghraṃ vacanaṃ dharmasaṃhitam |' mṛga uvāca — 'tābhyāṃ yaduktaṃ bho vyādha tatsatyaṃ hi bhavenmama | prabhāte tvadgṛhaṃ nūnamāgamiṣyāmi hiṃsaka | bhāryā ṛtumatī me'dya kāmārtā'pi ca sāṃpratam | gatvā gṛhe'dya tāṃ bhuktvā anujñāpya suhṛjjanam | śapathairāgamiṣyāmi tvadgṛhaṃ nātra saṃśayaḥ | na me dehe'styasṛṅmāṃsaṃ yattvaṃ bhoktumabhīpsasi | tadvṛthā maraṇaṃ me syādyadi māṃ tvaṃ haniṣyasi |
11.p14.9
tanmṛgasya vacaḥ śrutvā vyādho vacanamabravīt | 'vyādha uvāca-'asatyaṃ bhāṣase dhūrta pratārayasi māmiha | jñāto mṛtyuḥ sphuṭaṃ yatra tatra gacchati kolpadhīḥ | vyādhasya vacanaṃ śrutvā vākyaṃ prāha varaṃ mṛgaḥ | śapathānvai kariṣyāmi yathā te pratyayo hṛdi |' vyādha uvāca-' mama tvaṃ śapathānbrūhi viśvāso yena jāyate | yathā hi preṣayāmi tvāṃ svagṛhaṃ prati kāmukam | ' mṛga uvāca- 'bhartāraṃ vañcayedyā strī svāminaṃ vañcayennaraḥ | mitraṃ vañcayate yastu gurudrohaṃ karoti yaḥ | | tena pāpena limpāmi yadyetadanṛtaṃ vade | bhedayedyastu mitrāṇi prāsādaṃ pātayettu yaḥ | viṣasaṃ tu rasaṃ dadyādekapaṅktyāṃ hi bhuñjatām | tena pāpena limpāmi yadyetadanṛtaṃ vade | pravāsaśīlā ye viprāḥ krayavikrayakāriṇaḥ|saṃdhyāsnānavihīnāśca vedaśāstravivarjitāḥ| madyapastrīsamāsaktāḥ paranindāratāstathā | parastrīsevakā nityaṃ parapaiśunyasūcakāḥ | śūdrānnābhojakāśraiva rasavikrayakārakāḥ | tena pāpena limpāmi nāyāmi yadi te gṛham | madyārthaṃ vikrayedyastu śūdro lobhavimohitaḥ | sarvācī sarvavikretā viprāṇāmapi nindakaḥ | vipravākyaṃ parityajya pākhaṇḍābhiratastathā | tena pāpena limpāmi nāyāmi yadi te gṛham | gāṃ yaḥ spṛśati pādena udite'rke prabudhyate | ekākī miṣṭamaśnāti vikarmaṇi tathā rataḥ | mātāpitrorabhaktaśca kriyāmuddiśya yācakaḥ | kanyāśulkopajīvī ca devabrāhmaṇanindakaḥ | eteṣā pātakaṃ mahyaṃ yadi nāyāmi te gṛham | yaḥ paṭhetsvarahīnaṃ ca lakṣaṇenaṃ vivarjitam | rathyāṃ paryaṭamānastu vedamuddhirate yadi |
11.p14.10
paṭhamānasya viprasya cāṇḍālaḥ śṛṇute yadi|tena pāpena limpāmi nāyāmi yadi te gṛham | veśyāratāḥ sadā ye ca devadāya̍nivārakāḥ | teṣāṃ pāpena limpāmi nāyāmi yadi te gṛham | śūdrānneṣu sadā saktāḥśūdrasaṃparkadūṣitāḥ | saṃdhyābhraṣṭāśca ye viprādāturdānanivārakāḥ | teṣāṃpāpenalimpāmi yadi nāyāmi te gṛham | bhartāramarthahīnaṃ ca kurūpaṃ vyādhipīḍitam | yā na pūjayate nārī rūpayauvanagarvitā | tasyāḥ pāpena limpāmi yadi nāyāmi te gṛham | ekādaśī ca yā māghe yā sā śivacaturdaśī | pūrvaviddhāṃ prakurvīta tasya pāpasya bhāgyaham | atha kiṃ bahunoktena bho lubdhaka tavāgrataḥ | yadi nāyāmi te gehaṃ mama satyaṃ bhavettava | tena vākyena saṃtuṣṭo vyādho vai gatakalmaṣaḥ | jahāra bāṇaṃ dhanuṣo mṛgo mukto vanaṃ prati | jagāma prītamanā yuktaḥ so'pi varānane | jalaṃ pītvātha hariṇaḥ praviṣṭo gahanaṃ vanam | gato'sau tena mārgeṇa yena yātaṃ mṛgīdvayam | lubdhakena tadā tatra jālimadhyai sthitena hi | chittvā vilvasya patrāṇi nikṣiptāni śivopari | ajñānācchivapūjā tu kṛtā tena tathā vratam | bruvañchivaṃ śivaṃ so'tha niḥsṛto jālimadhyataḥ | pāpānmukto'bhavadvyādhaḥ śivarātriprabhāvataḥ | yāvannirīkṣate dikṣu niśānte bhojanaṃ prati | tāvacchidraśuvṛtā cānyā mṛgī tatra samāgatā | dṛṣṭvā mṛgīṃ tadā vyādhro bāṇaṃ dhanuṣi saṃdadhe | yāvanmuñcati bāṇaṃ
Linked texts (3)
- Smṛtikaustubha — Anantadeva 1638, Sanskrit
- Saṃvatsaradīdhiti — Anantadeva 1650, Sanskrit
- Abdadīdhiti — Anantadeva 1645, Sanskrit