Jayasimhakalpadruma 12.p2.9

12.p2.9

taduktaṃ tatraiva-'māsamekaṃ bahiḥ snātvā nadyādau vimale jale | ekādaśyāṃ ca dvādaśyāṃ paurṇamāsyāmathāpi vā | upoṣya niyato bhūtvā kuryādudyāpanaṃ budhaḥ | maṇḍapaṃ kārayedādau kalaśaṃ tatra vinyaset | niṣkeṇa vā tadardhena tadardhārdhena vā punaḥ | śaktyā vā kārayeddevaṃ sauvarṇaṃ lakṣaṇānvitam | lakṣmīyutaṃ jagannāthaṃ pūjayedāsane budhaḥ | bhūṣaṇaiścandanaiḥ puṣpairdīpanaivedyasaṃcayaiḥ | evaṃ saṃpūjya vidhivadrātrau jāgaraṇaṃ caret| śvobhūte kṛtamaitro'tha grahavedyāṃ grahānyajet | homaṃ kuryātprayatnena pāyasena vicakṣaṇaḥ | tilājyena yavairvāpi sarvairvāpi svaśaktitaḥ | aṣṭottarasahasraṃ vā śatamaṣṭottaraṃ tu vā | pratadviṣṇuranenaiva idaṃviṣṇuranena vā | vratapūrtiprasiddhyarthaṃ dhenumekāṃ payasvinīm | pādukopānahau chatraṃ gurave vyajanaṃ tathā | śayyāṃ sopaskarāṃ dadyāddīpikāṃ tarpaṇaṃ tathā | brāhmaṇānbhojayetriṃśattebhyo dadyācca dakṣiṇām | kalaśāalasaṃpūrṇāṃstebhyo dadyādyavāṃstathā | evaṃ kṛte mādhavasya codyāpanavidhau śubhe | phalamāpnoti sakalaṃ viṣṇusāyujyamāpnuyāt |' etāvatyaśaktau tatraivoktam-'vaiśākhaṃ vidhinā snātvā bhojayedbrāhmaṇāndaśa | kṛśaraṃ sarvapāpebhyo mucyate nātra saṃśayaḥ |' iti | bhaṭṭojidīkṣitīye nirṇayasindhau ca yadā tu vaiśākho malamāso bhavati tadā kāmyānāṃ tatra samāptiniṣedhānmāsadvayaṃ snānaṃ tanniyamāśca kartavyāḥ | māsopavāsacāndrāyaṇādi tu malamāsa eva samāpayet | taduktaṃ dīpikāyām-niyatatriṃśaddinatvācchubhe māsyārabhya samāpayet maline māsopavāsādikam iti | evaṃ kārtikasnānādāvapi |