Jayasimhakalpadruma 12.p6

12.p6

asyāmeva pūrṇimāyāṃ tiladānaṃ chatropānahādidānaṃ ca kuryāt | taduktaṃ nirṇayāmṛte-‘jyeṣṭhe māsi tilāndadyātpaurṇamāsyāṃ viśeṣataḥ | aśvamedhasya yatpuṇyaṃ tatprāpnoti na saṃśayaḥ |' iti | viṣṇudharmottare-‘sopavāsastathā jyeṣṭhe pūrṇe tu śaśalakṣaṇe | upānahau tathā chatraṃ dattvā'tyantaṃ sukhī bhavet | tatra mantraḥ-‘ upānahau pradāsyāmi kaṇṭakādinivāraṇe | sarvasthāneṣu sukhade ataḥ śāntiṃ prayaccha me |' chatradānamantraḥ'ihāmutrātapatrāṇāṃ kuru me keśava prabho| chatraṃ tvatprītaye dattaṃ brāhmaṇāya mayā saha|'iti| viṣṇusmṛtau-‘ jyeṣṭhī jyeṣṭhāyutā cetsyācchatropānatpradānena naro narādhipatyamāpnoti' iti | tathā vāmanapurāṇe-‘udakumbhāmbudānaṃ ca tālavṛntaṃ sacandanam | trivikramasya prītyarthaṃ dātavyaṃ jyeṣṭhamāsi tu |' iti | iyaṃ ca raucyamanvādiḥ kaurmakalpādiśca