Jayasimhakalpadruma 14.p2.7

14.p2.7

asya tithisāmye yathāsthita eva | vṛddhikṣayayostu viśeṣamāha laugākṣiḥ-'titheḥ parasyā ghaṭikāstu yāḥ syurnyūnāstathaivāpyadhikāśca tāsām | ardhaṃ viyojyaṃ ca tathā prayojyaṃ hrāse ca vṛddhau prathame dine tat ' iti | tataśca yadā caturviṃśannāḍīrūpaparamadinasamaye paurṇamāsī ṣoḍaśaghaṭikā saptadaśaghaṭikā vā ṣaḍviṃśati ghaṭikārūpaparamakṣīṇadinasamaye ca dvādaśaghaṭikā trayodaśaghaṭikā vā | evaṃ viṣuvādāvapyūhyam | paradine ca pratipantrimuhūrtavṛddhā tadā yathāsthitasaṃdhyālocane āvartane tatpūrvaṃ vā saṃdheḥ parvacaturthāṃśarūpayāgakālalābhācca saṃdhidine yāgaḥ prāpnoti | ardhavṛddhiprakṣepeṇa tu saṃdhinirṇaye paradine | evamanyadāpyūhyam | paradine pratipantrimuhūrtanyūnā | tadā'parāhnasaṃdhau | 'saṃdhiryadyaparāhne syāt' iti vacanāt pratipaccaturthāṃśasyāpi keṣāṃcinmate yāgakālatvātparadine yāgaḥ prāpnoti | yathāsthitasaṃdhyālocane ardhaprakṣepeṇa tu saṃdhidina eveti viśeṣaḥ | atra kecit | yadi caturdaśī daśadaṇḍā parva ca pañcadaśadaṇḍamitaṃ pratipattu ekonaviṃśatidaṇḍā tadā pratipadvṛddherardhaṃ daṇḍadvayaṃ parvānte prakṣipanti | evaṃ caturdaśī yadi pañcaviṃśatidaṇḍā parvaikonaviṃśati daṇḍaṃ pratipaccaturdaśadaṇḍā tadā pratipaddhrāsārdhaṃ ghaṭikādvayaṃ parvānte prakṣipanti | tadayuktam | īdṛśe viṣaye parvāpekṣayā pratipado hrāsasya vṛddhervā'bhāvāt | pratyudāharaṇe hrāsa evāsti hrāsodāharaṇe vṛddhiriti | na hi ghaṭikānyūnādhikyabhāve hāsavṛddhī bhavataḥ | kiṃ tu caturdaśyuttaraṃ yāvatyaḥ parvaghaṭikāstata ādhikye nyūnatve pratipado hāsavṛddhī iti |