Jayasimhakalpadruma 3.p25

3.p25

tacca pratyahaṃ yathāśakti ekadvyādikrameṇa kāryaṃ tatprakāraśca devīpurāṇe-'brahmovāca | na tathā tuṣyate śakra homadānajapena tu | kumārībhojanenātra yathā devī prasīdati | pitaro vasavo rudrā ādityā gaṇalokapāḥ | sarve te pūjitāstena kumāryo yena pūjitāḥ | śuklāṣṭamīcaturdaśyornavamyāṃ ca viśeṣataḥ | kṛṣṇapakṣe viśeṣeṇa bhojayettu kumārikāḥ |' iti | anyatrāpi - 'prakṣālya pādau sarvāsāṃ kumārīṇāṃ ca vāsava | sulipte bhūtale ramye tatra tā āsane sthitāḥ | pūjayedgandhapuṣpaiśca sragbhiścāpi manoramaiḥ| pūjayitvā vidhānena bhojanaṃ tāsu dāpayet | khaṇḍalaḍḍuguḍaṃ sarpirdadhi kṣīraṃ samākṣikam| tāsāṃ deyaṃ kumārīṇāṃ śanairbhuñjāpayettu tāḥ | pānīyaṃ yācitaṃ deyamannaṃ vā yācitaṃ