Jayasimhakalpadruma 4.p70

4.p70

mārgaśīrṣaśuklacaturthī varacaturthī tasyāṃ sarvārthasādhakamabdacatuṣṭayasādhyaṃ vratamuktaṃ skandapurāṇe-'caturthyāṃ mārgaśīrṣe tu śuklapakṣe nṛpottama | prārabhya pratimāsaṃ ca caturthyāṃ gaṇanāyakam | saṃpūjya vidhinā kuryādekabhaktaṃ samāhitaḥ | akṣāralavaṇaṃ tvevaṃ pūrṇe saṃvatsare tataḥ | dvitīye vatsare cātha naktaṃ praticaturthikam | kuryādgaṇeśamabhyarcya tṛtīye'yācitaṃ tathā | evameva prakurvīta caturthe syādupoṣaṇam | tataścaturthe saṃpūrne tadudyāpanamācaret | idaṃ varacaturthyākhyaṃ vrataṃ sarvārthasādhakam |' iti | iti skandapurāṇoktaṃ varacaturthīvratam | atra prathamavarṣe ekabhaktamuktaṃ tatsvarūpaṃ tu dinārdhasamaye ityādinā pūrvamevoktam | yattu kenaciduktam-'bhojanaṃ tu vidhiprāptaṃ dvātriṃśadgrāsasaṃmitam |' tenaikabhaktam ekonatriṃśadgrāsā iti phalito'rtha iti | tatuccham | bhikṣukasyaikabhukte kadācitsvalpabubhukṣāprāptāvetanniyamasyāsaṃbhavāt, vacanābhāvācca | svalpabubhukṣāvata ekonatriṃśadgrāsādnāsaṃbhavācca | nanu 'aṣṭau grāsā munerbhakṣyāḥ ṣoḍaśāraṇyavāsinaḥ | dvātriṃśataṃ gṛhasthasyāparimitaṃ brahmacāriṇaḥ |' iti vacanamastīti cet | satyam | etadvacanasya parigṛhītaniyatasāyaṃprātaranuṣṭheyapramāṇāgnihotraviṣayatvāt | etadvacanasya tadviṣayatvaṃ ca baudhāyanasūtre spaṣṭam | grāsalakṣaṇaṃ tu-'kukkuṭāṇḍasamo grāso yathā vā mukhamāviśet |' iti | yāvadevaṃ grasituṃ śakyamiti yājñavalkyadharmapraśrayoruktam | tasmānnyūnagrāsatrayeṇa tvityatra grāsatrayaśabdo nyūnatvopalakṣaṇārthaḥ