Jayasimhakalpadruma 4.p85

4.p85

atha śrāvaṇaśuklapañcamī | sā nāgapūjāyāṃ paraviddhā grāhyā | taduktaṃ camatkāracintāmaṇau-' pañcamī nāgapūjāyāṃ kāryā ṣaṣṭhīsamanvitā | tasyāṃ tu tuṣitā nāgā itarāḥ sacaturthikāḥ |' iti | pratāpamārtaṇḍamadanaratnādāvapyevam | atra kṛtyamuktaṃ kāśīkhaṇḍe-' yaḥ snāto nāgapañcamyāṃ kuṇḍe vāsukisaṃjñake | na tasya viṣasaṃsargo bhavetsarpasamudbhavaḥ | kartavyā nāgapañcamyāṃ yātrā varṣāsu tatra vai | nāgāḥ prasannā jāyante kule tasyāpi sarvadā |' iti | atra viśeṣo hemādrau bhaviṣye- ' śrāvaṇe māsi pañcamyāṃ śuklapakṣe narādhipa | dvārasyobhayato lekhyā gomayena viṣolbaṇāḥ | pūjayedvidhivadvīra dadhidūrvāṅkuraiḥ kuśaiḥ | gandhapuṣpopahāraiśca brāhmaṇānāṃ ca tarpaṇaiḥ | ye tasyāṃ pūjayantīha nāgānbhaktipuraḥsaram | na teṣāṃ sarpato vīra bhayaṃ bhavati kutracit |' iti | nāgapratimālakṣaṇamuktaṃ mātsye-'nāgāścaiva tu kartavyāḥ khaṅga kheṭakadhāriṇaḥ | adhaḥsarpākṛtisteṣāṃ nābherūrdhvaṃ tu mānuṣī | phaṇāśca mūrdhni kartavyā dvijivhā bahavo'samāḥ|' iyameva rauravakalpādiḥ