Jayasimhakalpadruma 5.p2

5.p2

ye'pyaṣṭamī parayutaiva grāhyā | 'upavāse saptamī tu vedhāddhantyuttaraṃ dinam | pakṣayorubhayoreṣa upavāsavidhiḥ smṛtaḥ|' iti nāradīyavacanena pakṣadvaye'pi saptamīviddhāyā niṣedhāt| ekādaśyaṣṭamī ṣaṣṭhīti pūrvodāhṛtabhṛguvacanācceti nigamavacane upavāsagrahaṇaṃ rudropavāsa viṣayam | 'rudravrateṣu sarveṣu kartavyā saṃmukhī tithiḥ | anyeṣu vratakalpeṣu yathoddiṣṭāmupāvaset |' iti smṛtyantaravacanānna tenāsya virodhaḥ | śaktipūjāyāṃ tvaṣṭamī rātrivyāpinī grāhyā | taduktaṃ devīpurāṇe-'niśāyāṃ pūjitā devī vaiṣṇavī pāpanāśinī | tasmātsarvaprayatnena aṣṭamyāṃ niśi pūjayet |' iti| ata eva durgābhaktitaraṅgiṇyāmapi rātripūjāyāmaṣṭamī rātriyoginī grāhyetyuktam | kālavyāmiśāstrāt | śuklapakṣe pūrvaviddhādareṇa kṛṣṇapakṣe vicārābhāvācca | dinadvaye rātrivyāptāvadhikarātrivyāpinī grāhyā | tulyavyāptāvuttaraiva | prāta rārabhya karmakālaparyantaṃ sadbhāvāt śivārcanacandrikāyāṃ kulārṇave-'nityārcanaṃ divā kuryādrātrau naimittikārcanam |' ityabhidhānācceti | ityaṣṭamīsāmānyanirṇayaḥ