Jayasimhakalpadruma 5.p26

5.p26

nāḍubhayatra candrodayasattve'sattve vā kṛṣṇapakṣe'ṣṭamī caiveti vacanātpūrvā | yadyuttaradine candrodayottaraṃ trimuhūrtā tadā hyuttaraiva | 'pūrvā vā paraviddhā vā grāhyā candrodaye sadā | trimuhūrtāpi sā pūjyā parataścordhvagāminī |' iti vacanāccandrodayādūrdhvaṃ trimuhūrtāṣṭamī cettadā paraiva grāhyā na cetpūrvetyarthaḥ | taduktaṃ candraprakāśe smṛtyantare-'ardharātramatikramya vartate yottarā tithiḥ | tadā tasyāṃ tithau kāryaṃ mahālakṣmīvrataṃ śubham |' iti | idaṃ ca vrataṃ doṣacatuṣṭayarahitāyāṃ tithau kartavyam | taduktaṃ purāṇasamuccaye-' pūjanīyā gṛhasthena aṣṭamī prāvṛṣi śriyaḥ | doṣaiścaturbhiḥ saṃtyaktā sarvasaṃpatkarī śubhā |' iti | doṣāśca tatroktāḥ- 'putrasaubhāgyarājyāyurnāśinī sā prakīrtitā | tasmātsarvaprayatnena tyājyā kanyāgate ravau | viśeṣeṇa parityājyā navamīdūṣitāṣṭamī |' atra kanyāgate ravau niṣedho vrataprārambhaviṣayaḥ | tathā-'tridine cāvame caiva aṣṭamīṃ nopavāsayet | putrahā navamīviddhā svaghnī hastārdhage ravau | dharmaghnī tridine proktā tyājyā caivāvame sati |' iti | svaṃ dravyaṃ hantīti svaghnī | navamīvedho, rakherhastottārdhadalagatatvaṃ, tridinatvam, avamadinatvaṃ ceti doṣacatuṣṭayam | tridināvamadinayorlakṣaṇaṃ ratnamālāyāmuktam-'yatraikaḥ spṛśati tithidvayāvasānaṃ vāśvedavamadinaṃ taduktamāryaiḥ | yaḥ sparśādvaivati tithitrayasya cāhnāṃ triyuspṛksa punaridaṃ dvayaṃ naceṣṭam |' etaddoṣavarjanamupakramyodyāpanayoreva prāyeṇa jñeyam | vratasyāṣoḍaśābdasādhyatvena madhye tyāgāyogāditi | iti mahālakṣmīvratanirṇayaḥ