Jayasimhakalpadruma 5.p29

5.p29

athāśvinakṛṣṇāṣṭamī | asyāṃ mahālakṣmīvratasamāptiḥ | sā ca sanirṇayā pūrvamevopapāditā | asyāmevāśvalāyanena mādhyāvarṣaṃ śrāddhamuktam | etena mādhyāvarṣaṃ prauṣṭhapadyā aparapakṣe iti | idaṃ ca saptamyādiṣu triṣvahaḥsu aṣṭakāvatkāryam | eteneti kṛtsnātideśāditi nārāyaṇavṛttiḥ | haradattastu māghāvarṣamiti pāṭhamaṅgīkṛtya maghāyuktavarṣābhavaṃ trayodaśīśrāddhamiti vyācakhyau | asyāmevāṣṭamyāṃ śrāddhasya gayāśrāddhatulyaṃ phalam | tathā ca pṛthvīcandrodaye brāhme-‘āṣāḍhyāḥ pañcame pakṣe gayāmādhyā'ṣṭamī smṛtā | trayodaśī gajacchāyā gayātulyā tu paitṛke |' hemādrau pādme'pi-‘vasunāmā pitrāṃ kanyā śaśāpānugrahāya ca | prauṣṭhapadyaṣṭakā bhūyaḥ pitṛloke bhaviṣyasi | āyurārogyadā nityaṃ sarvakāmaphalapradā |' iti | etasyāḥ padmasaṃjñā | tathā ca jātūkarṇyaḥ-‘śaṃkhaṃ prāhuramāvāsyāṃ kṣīṇasomāṃ dvijottamāḥ | aṣṭakāṣṭaṃ bhavetpadmaṃ tatra tathākṣayam |' iti