Jayasimhakalpadruma 5.p42.2

5.p42.2

sūryagrahe kurukṣetre mahādānaiḥ kṛtairmuhuḥ | yatphalaṃ samavāpnoti śrīrāmakavamīvratāt|' iti | 'maivaṃ phalaśruternityalakṣaṇābhāvato'tha vā | na nityatā tatra nādyo'gnihotrādau virodhataḥ | nāntyo'pyakaraṇe tasya mahādoṣaśruteḥ sphuṭam | prāpte śrīrāmakavamīdine martyo vimūḍhadhīḥ | upoṣaṇaṃ na kurute kumbhīpākeṣu pacyate | akṛtvā rāmanavamīvrataṃ sarvavratottamam | vratānyanyāni kurute na teṣāṃ phalabhāgbhavet | yastu rāmanavamyāṃ tu bhuṅkte mohādvimūḍhadhīḥ | kumbhīpākeṣu ghoreṣu pacyate nātra saṃśayaḥ|' iti|'ataḥ svīkaraṇe doṣavidhvaṃsānnityatā sthitā| kuryādrāmanavamyāṃ ya upoṣaṇamatandritaḥ | na māturgarbhamāpnoti sa vai rāmo bhavetsvayam | tasmātsarvātmanā sarve kṛtvaiva navamīvratam | mucyante sarvapāpebhyo yānti brahma sanātanam|' ityādivacanaiḥ pāpakṣayadvārā mokṣārthatvamavagamyate | saṃyogapṛthaktvācca na phalanityatayorvirodhaḥ | atra kecit-tadupāsakānāmevedaṃ na tvanyeṣāmityāhuḥ | anye tu akaraṇe doṣaśravaṇāt 'tasmātsarvātmanā sarvaiḥ kāryaṃ vai navamīvratam|' iti pūrvoktavacanācca janmāṣṭamīvadidamapi sarveṣāṃ nityam, anyathā janmāṣṭamīdāvapi tadupāsakānāmeva nityatāṃ vaktuḥ ko vārayitetyāhuḥ | iti nityatvakathanam | 'śuddhā viddheti bhedena navamī sā dvidhā smṛtā | samā nyūnā'dhikā ceti śuddhāpi navamī tridhā | punarnakṣatrasaṃyogavibhāgābhyāṃ tu ṣaḍvidhā | samādisarkṣabhedādibhedairviddhāpi ṣaḍvidhā | evaṃ dvādaśadhā bhinnā navamī tatra nirṇayaḥ | mahāphalapradā śuddhā punarvasvṛkṣayogataḥ | caitre māsi navamyāṃ tu jāto rāmaḥ svayaṃ hariḥ |