Jayasimhakalpadruma 5.p47

5.p47

asyāmeva navamyāṃ kālottaroktaṃ mātṛkāvratam | 'caitraśuklanavamyāṃ tu mātṛvratamathācaret | catuḥṣaṣṭiratu saṃpūjyā bhairaveṇa samanvitāḥ | sraggandhavastra naivedyaiḥ prabhūtaiḥ susitaiḥ śubhaiḥ |' ityupakramya 'navamyāṃ pūjayedyastu māsi cāśvayuje sadā | akhaṇḍitaprabhāvastu bhavennātrāsti saṃśayaḥ' ityādi hemādrau spaṣṭam | iti mātṛkāvratam | asyāmeva bhadrakālīpūnamuktaṃ kalpatarau brāhme-'caitre navamyāṃ śuklāyāṃ bhadrakāḷī mahābalā | yoginīnāṃ tu sarvāsāmadhipatye'bhiṣecitā | tasmāttāṃ pūjayettatra sopavāso jitendriyaḥ | vicitrairbalibhirbhaktyā sarvāsu navamīṣu ca ' iti