Jayasimhakalpadruma 7.p3.3

7.p3.3

bhagīrathaṃ ca nṛpatiṃ himavantaṃ nageśvaram | gandhapuṣpādibhiḥ samyagyathāśakti prapūjayet | daśaprasthāṃstilāndadyāddaśaviprebhya eva ca | daśaprasthānyavāndadyāddaśasaṃkhyā gavīstathā | prasthaḥ ṣoḍaśapalāni | prasthādimānaṃ bhaviṣye-‘palaṃ ca kuṇḍavaḥ prastha āḍhako droṇa eva ca| dhānyamāneṣu boddhavyāḥ kramaśoḍamī caturguṇāḥ' ‘ iti muṣṭimātraṃ palaṃ smṛtam' iti mahārṇave | ‘matsyakacchapamaṇḍūkamakarādijalecarān | kārayitvā yathāśakti svarṇena rajatena vā | tadalābhe piṣṭamayānabhyarcya kusumādibhiḥ | gaṅgāyāṃ prakṣipedājyadīpāṃścaiva pravāhayet | puṣpādyaiḥ pūjayedgaṅgāṃ mantreṇānena bhaktitaḥ|' “oṃnamaḥ śivāyai nārāyaṇyai daśaharāyai gaṅgāyai namonamaḥ ” | ‘iti mantraṃ tu yo martyo dine tasmindivāniśam | japetpañca sahasrāṇi daśadharmaphalaṃ labhet |' iti | kāśīkhaṇḍe tvanyo mantraḥ uktaḥ | ‘ namaḥ śivāyai prathamaṃ nārāyaṇyai padaṃ tataḥ | daśaharāyai padamiti gaṅgāyai mantra eṣa vai | svāhāntaḥ praṇavādiñca bhavedviṃśākṣaro manuḥ | pūjā dānaṃ japo homo'nenaiva manunā smṛtam | ’ iti | atra gaṅgāstotrapāṭhamapi daśavāraṃ kuryāt | taduktaṃ bhaviṣyottare— |‘tasyāṃ daśamyāmetacca stotraṃ gaṅgājale sthitaḥ | yaḥ paṭheddaśakṛtvastu daridro vāpi cākṣamaḥ | so'pi tatphalamāpnoti gaṅgāṃ saṃpūjya yatnataḥ | ’ tacca pratipadādidaśamīparyantaṃ dinasaṃkhyayā paṭhanīyamityācāraḥ | evaṃ kurvataḥ phalamuktaṃ kāśīkhaṇḍe— ‘evaṃ kṛtvā vidhānena vittaśāṭhyavivarjitaḥ | upavāsī vakṣyamāṇairdaśapāpaiḥ pramucyate | sarvānkāmānavāpnoti pretya brahmaṇi līyate |’ iti |