Jayasimhakalpadruma 8.p3.5

8.p3.5

‘ekādaśī tu saṃpūrṇā sadṛśī cottarā bhavet |’ iti, ‘pūrṇā bhavedyadā nandā bhadrā caiva hi vardhate’ ityādiṣu caśabdaśravaṇācchrautamapi vaktuṃ śakyate | yeṣu tu‘upopyā dvādaśī śuddhā’ ityādiṣu dvādaśyāḥ śuddhatvābhidhānāttadupalakṣayituṃ na śakyate-tāni vaiṣṇavaviṣayāṇi | yadapi ekaliṅgyeti brahmapurāṇavacanaṃ śuddhadvādaśyāṃ pāraṇaniṣedhadvārānadhikāyāmapi śuddhaikādaśyāmapupavāsapratiṣedhakaṃ tacchuddhadvādaśyāmevopavāsaṃ vidadhāti-tadapi vaiṣṇavaviṣayam | samāhīnādhikottaretyādivacanavirodhāt | saṃyuktagrahaṇādapi tathā ‘udayātprāgdaśamyāstu śeṣaḥ saṃyoga ucyate|’ iti kūrmapurāṇāt | yattu pṛthvīcandrodaye bṛhannāradīyanāmnā likhitamananyagatikaṃ spaṣṭaṃ vacanaṃ ‘saṃpūrṇaikādaśī śuddhā dvādaśyāṃ naiva kiṃcana| dvādaśī ca trayodaśyāmasti tatra kathaṃ bhavet | pūrvā gṛhasthaiḥ kāryā syāduttarā yatibhistithiḥ |’ iti-taddhemādriṇāpyalikhanātsarvaiścaikādaśīmātravṛddhau viddhaikādaśyāṃ vā gṛhayativyavasthāpratipādakavākyalikhanādanākaram| tasmācchuddhāyāmanadhikāyāṃ dvādaśyā dhikye'pi pūrvedyurevopavāsaḥsarveṣām|yā tu śuddhādhikādhikadvādaśikā-tasyāṃ sarveṣāṃ paredyurevopavāsaḥ | atra ca pramāṇabhūtāni bhṛgvādivacanāni pūrvameva likhitāni| etadviṣayameva ‘ṣaṣṭidaṇḍātmikāyāśca titherniṣkrāmaṇe pare | akarmaṇyaṃ tithimalaṃ vidyādekādaśīṃ vinā|’ iti gauḍanibandhalikhitavacanam | ṣaṣṭidaṇḍātmikāyā ityaviddhopalakṣaṇam | pāraṇāṃ ca paradine dvādaśīmadhya eva tadyogyadvādaśīlābhe | yā tu śuddhādhikānadhikadvādaśikā-tatra sakāmānāṃ pūrvedyurniṣkāmānāmūttaredyurupavāsaḥ |