Maharnava (Vishveshvarabhatta) 2.p60

2.p60

rogapratimādāna vidhiruktaḥ| rogāśca trividhāḥ| karmajā doṣajā ubhayavidhāśceti | tathācāyurveda— karmaprakopeṇa kadācidetedoṣaprakarṣeṇa bhavanti cānye | tathā'pare prāṇiṣu karmadoṣaprakarṣajāḥ kāyamanovikārāt | iti | ete-rogāḥ | ye ca rogāḥ karmajā ubhayajāśca tatra prathamataḥ prāyaścittaṃ vidhāya paścāt pratikṛtidānādi kurvīta | tathā ca karmavipākasaṃgraheprāyaścittamakṛtvātu kuryāt karma na kiñcana | anistīrṇamaghaṃ nityaṃ vardhate dviguṇaṃ punaḥ | dānairdayādibhirapi dvijadevatāgovedārcanapraṇatibhiśca japaistapobhiḥ | ityuktapuṇyanicayai rapatīyamānāḥ prākpāpajātamaśubhaṃ praśamaṃ nayanti || vedārcā-vedavidbrāhmaṇapūjā vedapustakārcanā ca | praṇatibhiḥ-devatānamaskāraiḥ | viśeṣataḥ sūryanamaskāraiḥ | 'ārogyaṃ bhāskarādicche'diti ca, ' namaskārapriyaḥ sūryaḥ ' ityapi ca smaraṇāt | tathā praṇati śabdenāśvatthapradakṣiṇakriyā'pi lakṣyate | japaiḥ-vedapārāyaṇamahāsaura śatarudrapuruṣasūktasahasranāmāpāmārjana viṣṇuhṛdayādijapaiḥ | aśubham-rogam | tathā— dṛṣṭāpacārajaḥ kaścit tathā pūrvāpacārajaḥ | tatsaṅkarādbhavatyanyo vyādhirevaṃvidhā mataḥ | dṛṣṭāpacārajaḥ-doṣotthaḥ | pūrvāpacārajaḥ-karmajaḥ | yathānidānaṃ doṣotthaḥ karmajo hetubhirvinā | mahārambho'lpake hetāvantako doṣakarmajaḥ