Nrisimhaprasada p156

p156

śaṅkhaḥ— ‘‘gaṅgāyamunayostīre payoṣṇyāmamarakaṇṭake | narmadābāhudātīre ca bhṛgutuṅge himālaye || gaṅgādvāre prayāge ca naimiṣe puṣkare tathā | sannihatyāṃ gayāyāṃ ca dattamakṣayatāṃ vrajet || tathā guruḥ-“kāṅkṣanti pitaraḥ putrānnarakāghātabhīravaḥ | gayāṃ yāsyati yaḥ kaścit so'smān santārayiṣyati || kariṣyati vṛṣotsargamiṣṭāpūrttaṃ kariṣyati | pālayiṣyati vṛddhatve śrāddhaṃ dāsyati cānvaham || gayāyāṃ dharmapṛṣṭhe ca sadasi brahmaṇastathā | gayāśīrṣe vaṭe caiva pitṝṇāṃ dattamakṣayami”ti || tathā brahmāṇḍe'pi-“nadīsamudratīre vā hrade goṣṭhe ca parvate | samudragānadītoye sindhusāgarasaṅgame || nadyorvā saṅgame rājan śālagrāmaśilāntike | puṣkare vā kurukṣetre prayāge naimiṣe'pi vā || śālagrāme ca gokarṇe gayāyāṃ ca viśeṣataḥ | tīrtheṣveteṣu yaḥ śrāddhaṃ pitṛbhaktisamanvitaḥ || karoti vidhivanmartyaḥ kṛtakṛtyo vidhīyata” iti | tathā viṣṇudigit-“gayāśīrṣe'kṣayavaṭe'marakaṇṭakaparvate” | yatra kvacana narmadātīre yamunātīre gaṅgāyāṃ viśeṣato gaṅgākuśāvarte bilvake nīlaparvate ujjvale bhṛgutuṅge kedāre mahālaye mallikāyāṃ sugandhāyāṃ phalgutīrthe mahāgaṅgāyāṃ taṇḍulikāśrame kumāradharāyāṃ prabhāse yatra kvacana sarasvatyāṃ viśeṣato naimiṣāraṇye vārāṇasyāmagastyāśrame kaṇvāśrame kauśikyāṃ sarayūtīre śoṇasya jyotirayodhyāyāśca saṅgame śrīparvate kālodake uttaramānase bar̤avāyāṃ saptarṣau viṣṇupādasvargamārgapradeśe godāvaryā gomatyāṃ vetravatyāṃ vipāśāyāṃ vitastāyāṃ śatadrutīre candrabhāgāyāmairāvatyāṃ sindhostīre dakṣiṇe pañcanade mānase caivamādiṣvanyeṣu tīrtheṣu saridvarāsu saṅgameṣu prabhaveṣu pulineṣu prasravaṇeṣu parvatanirrjhareṣu vaneṣu vanopavaneṣu ca gomayenopalipteṣu gṛheṣu manojñeṣu ceti | atra pitṛgāthā bhavati— “kule'smākaṃ sa jantuḥ syāt yo no dadyājjalāñjalīn | nadīṣu bahuttoyāsu śītalāśu viśeṣataḥ || api jāyeta so'smākaṃ kule kaścinnarottamaḥ | gayāśīrṣe vaṭe śrāddhaṃ yo naḥ kuryāt samāhitaḥ || eṣṭavyā bahavaḥ putrā yadyeko'pi gayāṃ vrajet | yajeta vā'śvamedhena nīlaṃ vā vṛṣamutsṛjet” || gayāśīrṣapramāṇaṃ cādipurāṇe'bhihitam | “pañcakrośaṃ gayākṣetraṃ krośamekaṃ gayāśiraḥ | mahānadyāḥ paścimena yāvad gṛdhreśvaro giriḥ || uttare brahmakuṇḍasya yāvaddakṣiṇamānasam | etad gayāśiro nāma triṣu lokeṣu viśrutam” iti | tathā— “droṇīvādanadīdhārā saraḥ śoṇanadaṃ tathā | dvārikā kṛṣṇātīrthaṃ ca tathā'rbudasarasvatī || nadī maṇamatī nāma tathā ca girikarṇikā | dhūtapāpaṃ tathā tīrthaṃ samudro dakṣiṇastathā || gokaṇè gajakarṇaṃ ca tathā ca puruṣottamaḥ | eteṣu pitṛtīrtheṣu śrāddhamānantyamaśnute | arjunaṃ trisureśaṃ ca siddheśvaramataḥ param || śrīśailaṃ śaṅkaraṃ tīrthaṃ narasiṃhamataḥ param | mahendraṃ ca tathā puṇyaṃ tathā śrīraṅgasaṃjñitam || tuṅgabhadrā nadī puṇyā tathā bhāgīrathī sarit | rāmeśvaraṃ kṛṣṇāveṇā kāverī vañjulā nadī | setubandhaṃ tathā tīrthaṃ yatra rāmeśvaro hariḥ || nadī godāvarī nāma trisandhyā tīrthamuttamam | kāyāvarohaṇaṃ nāma yatra carmaṇvatī nadī || tīrthaṃ tryambakaṃ nāma sarvatīrthamahatphalam | gomatī bahulā tadvat tīrthaṃ mānasarovaram” iti