Nrisimhaprasada p17

p17

tathā"homaśca piṇḍadānañca tathā brāhmaṇatarpaṇam | śrāddhaśabdābhidheyaṃ syādekasminnaupacārikaḥ" || śrāddhaśabda iti śeṣaḥ | tacca śrāddhamavaśyamanuṣṭheyam | tadāha manuḥ— “śrāddhātparataraṃ nānyacchreyaskaramudāhṛtam | tasmātsarvaprayatnena śrāddhaṃ kuryādvicakṣaṇaḥ” iti | viṣayaparocanāmapekṣamāṇaḥ kuryādityayaṃ vidhiḥ svaviṣayaparocakāni vākyānyapekṣate, tāni ca yājñavalkyādipraṇītāni kānicit kriyāparocakāni, kānicitkartavyatāyāḥ, tatrādyāni tāvatpradarśyante | tatra brahmapurāṇe— “tasmācchrāddhaṃ naro bhaktyā śākairapi yathāvidhi | kurvīta kurvataḥ śrāddhaṃ kule kaścinna sīdati” || kūrmapurāṇe— “yo yena vidhinā śrāddhaṃ kuryādekāgramānasaḥ | vyapetakalmaṣo nityaṃ yāti nāvartate punaḥ” || nāgarakhaṇḍe— “kālāntareṣu te toyaṃ labhante cānnamameva ca | na dattaṃ vaṃśajairyeṣāṃ te vyathāṃ yānti dāruṇām || kṣutpipāsārasamudbhūtāṃ, tasmātsantarpayet pitṝn | nityaṃ śaktyā yathā rājaṃstoyairbhojyaiḥ pṛthagvidhaiḥ || tathānyairvastranaivedyaiḥ puṣpagandhānulepanaiḥ | tarpitāste prayacchanti kāmāniṣṭān hṛdi sthitān || trivargaśca mahārāja ? pitaraḥ śrāddhatarpitāḥ | tathā viṣṇupurāṇe-pitṛgītāstathaivātra ślokāstān śṛṇu pārthiva 1 | tathaiva bhavatā bhāvyaṃ tena tatra dhṛtātmanā || api dhanyaḥ kule jāto yo'smākamatimātrataḥ | akurvan vittaśāṭhyaṃ yaḥ piṇḍānno nirvapiṣyati || yamasmṛtau-"imaṃ mantraṃ vidhiśreṣṭhaṃ kāmārthaṃ kathi(lpi)taṃ dvijaiḥ | ye viprā hyanuvartante teṣāṃ lokāḥ sanātanāḥ || āyuḥ putrānyaśaḥ svargaṃ kīrtiṃ puṣṭiṃ balaṃ śriyam | paśūnsaukhyaṃ dhanaṃ dhānyaṃ prāpnuyātpitṛpūjanāt" || brahmapurāṇe-"evaṃ samyaggṛhasthena devatāḥ pitarastathā | sampūjyā havyakavyena annenāpi svabāndhavāḥ || paratra ca parāṃ puṣṭiṃ lokāṃśca vipulān śubhān | śrāddhakṛtsamavāpnoti yaśaśca vipulaṃ naraḥ" || viṣṇudharmottare-"adyaprabhṛti lokeṣu pretānuddiśya vai pitṝn | ye tu śrāddhaṃ kariṣyanti teṣāṃ puṣṭirbhaviṣyati || pitā pitāmahaścaiva tathaiva prapitāmahaḥ | teṣāṃ trayaḥ pūjitāśca bhaviṣyanti tathā'grataḥ || trayo vedāśca lokāśca trayo, devāstathaiva ca | pūjitāśca trayo devā brahmaviṣṇumaheśvarāḥ || śrāddhakāle tathā'nnena piṇḍanirvapaṇaṃ tathā | pitṝṇāṃ ye kariṣyanti teṣāṃ puṣṭirbhaviṣyati || pūjitastairbhaviṣyāmi caturātmā tathā'pyaham | pitṛpaitāmahaḥ piṇḍo vāsudevaḥ prakīrtitaḥ || paitāmahaśca nirdiṣṭastathā saṅkarṣaṇaḥ prabhuḥ | pitṛpiṇḍaśca vijñeyaḥ pradyumnaścāparājitaḥ || ātmā'niruddho vijñeyaḥ piṇḍanirvapaṇaṃ budhaiḥ”