Nrisimhaprasada p171

p171

anyasminpakṣe vā tattithau veti | tatra prathamapakṣastvaviruddha eva | punastadahareveti pakṣavihitaṃ sūtakavyatiriktanimittāntarotpanne vighne pratimāsaṃ jñayāhavihitaikoddiṣṭamāsikaśrāddhaviṣayamiti pūrvoktavacanāviruddha iti vyavasthā jñāpyate | “ekoddiṣṭe tu samprāpte yadi vighnaḥ prajāyate | anyasmiṃstattithau tasmin śrāddhaṃ kuryādyathāvidhi” iti devalasmaraṇāt | anyasminnantare māsi tattithau mṛtatithau yasmin śukle kṛṣṇe vā mṛtastasminpakṣe, śrāddhaṃ vighnavaśādatikrāntaṃ kuryādityarthaḥ | āśaucanimittena vighne jāte māsikaṃ śrāddhamapi sūtakānantarameva vacanabalādanuṣṭheyam | devasvāmī ca evameva vyavasthāṃ kṛtavān | yattu vyāsenoktaṃ— “śrāddhavighne samutpanne tvantarā mṛtasūtake | amāvāsyāṃ prakurvīta śuddhāveke manīṣiṇaḥ” | antarā mṛtasūtake śrāddhaprayogamadhye pākopakramāt prāk mṛtake sūtake vā jāte amāvāsyām amāvāsyāyāṃ śuddhau śuddhyananta raṃ vā anuṣṭheyamiti, idamapi anumāsikasāṃvatsarikaśrāddhaviṣayam | “māsike'bde tu samprāpte tvantarā mṛtasūtake | vadanti śuddhau tatkāryaṃ darśe vā'pi vicakṣaṇāḥ” iti ṣaṭtriṃśanmatavacanāt | darśagrahaṇantu śuklakṛṣṇaikādaśyorupalakṣaṇārtham , “śrāddhavighne samutpanne tvavijñāte mṛte'hani | ekādaśyāntu kartavyaṃ kṛṣṇapakṣe viśeṣataḥ” iti marīcismaraṇāt