Nrisimhaprasada p173

p173

“tithicchedo na karttavyo vinā''śaucaṃ yadṛcchayā | piṇḍaṃ śrāddhaṃ ca dātavyaṃ vicchittiṃ na ca kārayedi”ti smaraṇāt | cakāro hyagnaukaraṇasamuccayārthaḥ | brāhmaṇatarpaṇamātramatraśrāddhaśabdābhidheyam piṇḍadānasya pṛthagupādānāt | vastutastu brāhmaṇabhojanapiṇḍadānahoma samudāyasya śrāddhaśabdābhidheyatvam, ekaikasmin śrāddhaśabdasyaupacārikatvāt | vicchittiṃ ca na kārayedityasyāyamarthaḥ | brāhmaṇabhojanasya kartumasāmarthye tatra piṇḍadānamātramapi kartavyam | sarvathā'pi karmavicchedo na kartavya iti | tathā ca nigamaḥ— “āhitāgneḥ pitrarcanaṃ piṇḍai reva brāhmaṇānapi vā bhojayedi”ti | atra vyavasthāvācako vāśabdaḥ | vyavasthā caitādṛśī—satyāṃ śaktau brāhmaṇatarpaṇapiṇḍadāne'nuṣṭheye, aśaktyā tu piṇḍadānamātramiti | iti śrīmallakṣmīnṛsiṃha caraṇayugalasaroruha bhramarasakala bhūmaṇḍalamaṇḍana samastayavanādhīśvara śrī nijāmasāha samastarājyadhurandhara śrīmanmahārājādhirāja śrī dalapatirājaviracite śrī nṛsiṃhaprasāde śrāddhasāre śrāddhabhedādinirṇayaḥ