Nrisimhaprasada p193

p193

iti vāyupurāṇāt | tato brāhmaṇapūjottaraṃ karasampuṭaṃ śirasi kṛtvā mantrahīnaṃ kriyāhīnamiti prārthanāṃ kuryāt | atrāvasare śrāddhācamanaṃ kāryam | śrāddhe ṣaḍghā''camanaśravaṇāt | tathāhi— "ādāvante tathā'rcāyāṃ viprapādamaśodhane | vikire piṇḍadāne ca ṣaḍbhirācamanaṃ smṛtam" iti | saptamyarthe tṛtīyā supāṃ supo bhavatīti pāṇinismaraṇāt | ayamarthaḥ smṛteḥ | ādāviti viprapādaśodhanātpūrvaṃ tathā tacchodhanānantaraṃ tathā ca samāptau āsīmāntamanuvrajyeti vrajanānantaram | spaṣṭamanyat | tatra prathamo dvidvirācamanaṃ śeṣaṃ sakṛtsakṛditi | "kṛtvā ca pitṛkāryāṇi sakṛdācamya śuddhyatī"ti smṛteḥ | athāgnaukaraṇam, tacca savyenāpasavyena vā kartavyam | tatra svagṛhyasmṛtyanurodhato vyavasthā jñeyā, tatra pūrvamagnau kariṣya iti brāhmaṇājñāmādāya kuruṣveti tairabhyanujñāta eva kuryāditi niyamaḥ | "agnau kariṣyannādāya pṛcchatyannaṃ ghṛtaplutam | kuruṣvetyabhyanujñāto hutvā'gnau pitṛyajñavat || hutaśeṣaṃ pradadyāttu bhājaneṣu samāhitaḥ | yathālābhopapanneṣu raupyeṣu tu viśeṣataḥ" iti yogīśvarasmaraṇāt | ghṛtagrahaṇaṃ vyañjanādinivāraṇāya | yadyapi godhūmā api kṣāradravye paṭhitāstathāpi vrīhyādyabhāve godhūmānāmodanaprakṛtitayopādānāt tadbharjaṃ kṣāradravyaṃ niṣidhyate | tathā madālasāvākyam | “agnikāryamanujñātaḥ kuruṣveti tato dvijaiḥ | juhuyād vyañjanakṣāraṃ varjayettu yathāvidhi” iti