Nrisimhaprasada p197.1

p197.1

māṇāsyāgnaukaraṇātvāttasya ca karmanāmadheyatvāt | tataḥ sāgniniragnirvā vaiśvadaive naiva dadyāt | “piṇḍebhyaḥ śeṣayetsarvaṃ na dadyādvaiśvadevike | nahi smṛtāḥ śeṣabhājo viśve devāḥ purāṇagairiti vāyupurāṇe niṣedhadṛṣṭeḥ | ato na vaiśvadaive deyamiti siddham | agnaukaraṇaṃ smārtam , ato vivāhāgnau kāryam | sarvādhāninaupāsanānyabhāve dakṣiṇāgnau kāryam | tadasannidhāne laukikāgnau kāryam | “āhṛtya dakṣiṇāgniṃ tu homārthaṃ vai prayatnataḥ | agnyarthaṃ laukikaṃ vāpi juhuyātkarmasiddhaye” iti vāyupurāṇavākyāt | agnyarthamaupāsanāgnisiddhyartham | dakṣiṇāgnyasannidhāne pāṇau homaṃ kuryāt | “haste'gnaukaraṇaṃ kuryāt agnau vā'nagniko dvijaḥ” iti smaraṇāt | ayaṃ hi smṛtyarthaḥ sāṃpradāyikaḥ | sarvādhāno tvāhahitāgniḥ dakṣiṇāgnyasannidhāne dvijahaste laukikāgnau vā'gnaukaraṇaṃ kuryāt | yadā tvādhānenāhitāgniranāhitāgnirapyagnimān , tadaupāsane'gnaukaraṇaṃ, tadabhāve dvijahaste'psu veti | taduktaṃ viṣṇudharmottare mārkaṇḍeyena— “āhitāgnistu juhuyāddakṣiṇāgnau samāhitaḥ | anāhitāgnistvaupāsane tadabhāve dvijo'psu ve”ti || jale agnaukaraṇaṃ jalasannidhau śrāddhānuṣṭhānaviṣayam | “sa yadā'pāṃ samīpe syācchrāddhe jñeyo vidhistade”ti kātyāyanasmaraṇāt | “agnyabhāve tu viprasya pāṇāvevopapādayet” iti manuvacanaṃ tu brahmacāriviṣayam || “agnyabhāve tu viprasya pāṇau dadyāttu dakṣiṇe | agnyabhāvaḥ smṛtastāvadyāvadbhāryāṃ na vindati” iti jātūkarṇyasmaraṇāt | agnau vidyamāne'pi kāmyādicatuṣṭaye pāṇāveva homaḥ kāryaḥ |