Nrisimhaprasada p53

p53

tathā— "nāstiko vā vikarmā vā saṅkīrṇastaskaro'pi vā | nānyattu kāraṇaṃ dāne yogiṣvāha prajāpatiḥ || pitarastasya tṛpyanti suvṛṣṭeneva karṣakāḥ | putro vā'pyathavā pautro dhyāninaṃ yastu bhojayet || yatistu sarvaviprāṇāṃ sarveṣāmagrabhugbhavet" iti | kecid guṇattvarā brahmapurāṇe darśitāḥ— "caturdaśānāṃ vidyānāmekasyā api pāragaḥ | yathāvarttamānaśca sarve te paṅktipāvanāḥ || ye tu bhāṣyavidaḥ kecit ye ca vyākaraṇe ratāḥ | adhīyānāḥ purāṇaṃ ca dharmaśāstramathāpi vā || akrodhanāḥ kṣāntiparāstān śrāddheṣu nimantrayet” iti | tathā— bārhaspatyaṃ nītiśāstraṃ śabdavidyāṃ ca vetti yaḥ | itihāsapurāṇaiśca yaḥ pavitrīkṛtaḥ sadā || akṛtyamapi kurvāṇaḥ sa pavitraśatāddaraḥ | bahunāñca kimuktena itihāsapurāṇavit || atharvaśiraso'dhyetā tāvubhau pitṛbhiḥ purā | tapaḥ kṛtvā tu yogāttu prārthitau pitṛkarmaṇi" iti || vṛddhaśātātapaḥ— "jñānī yasya gṛhe'śnāti udakaṃ vā pibedyadi | kṛtaṃ tena mahat kṛtyaṃ tāritaṃ ca kulatrayam || yoginaṃ samatikramya gṛhasthaṃ yadi bhojayet | tattatkulamavāpnoti svargasthamapi pātayet || yoginaṃ tu vyatikramya pūjayanti vyatikramam | bhoktārastu sadācārā narake syuḥ sabāndhavāḥ" iti