Nrisimhaprasada p67

p67

śakyatvāt kimarthaṃ varjyānāṃ parigaṇanā, satyaṃ, uktalakṣaṇalacitābhāve yasya kasyāpi prāptau pratiṣiddhavarjaṃ grāhyā ityetadarthaṃ pārthakyena varjyānāmupasaṅgrahaṇāmiti na doṣaḥ| tathā ca brahmāṇḍe"śrāddhārhabrāhmaṇāyoge niṣiddhā na kathañcana | nimantraṇīyāḥ śrāddheṣu samyakphalamabhīpsate"ti | ete brāhmaṇāḥ prāgeva samyakparīkṣya pūrvedyurnimantraṇīyāḥ| "śrāddhamācariṣye iti pūrvedyurnimantraye"diti hārītasmaraṇāt| asambhave paredyurvā nimantrayīta | tathoktaṃ kūrmeṇa"śvo bhaviṣyati me śrāddhaṃ śrāddhakarmaṇyupasthite | nimantrayīta tryavarān samyagviprānyathoditān" iti | nimantraṇarītiḥ pracetasoktā"kṛtāpasavyaḥ pūrvedyuḥ pitṝn pūrvaṃ nimantrayet | bhavadbhiḥ pitṛkāryaṃ naḥ sampādyaṃ ca prasīdata || savyena vaiśvadevārthaṃ praṇipatya nimantrayet" iti | iti śrīmallakṣmīnṛsiṃhacaraṇayugalasaroruhabhramarasakalabhūmaṇḍalamaṇḍanasamastayavanādhīśvara śrīnijāmaśāha samastasāmrājyadhurandharaśrīmanmahārājādhirāja śrīdalapatirājaviracite śrīnṛsiṃhaprasāde śrāddhasāre pātranirūpaṇam