Nrisimhaprasada p80

p80

“munyannāni payaḥ somo māṃsaṃ yaccānupaskṛtam | akṣāralavaṇaṃ caiva prakṛtyā havirucyate” iti | anupaskṛtamavikṛtaṃ pūtigandhādirahitaṃ māṃsam | akṣāralavaṇastu ucyate— “tilamudgāhate śaivyaṃ sasye godhūmakodravau | dhānyakaṃ devadhānyaṃ ca śamīdhānyaṃ tathaikṣavam || svinnadhānyaṃ tathā pathyaṃ mūlaṃ kṣāragaṇaḥ smṛtaḥ” iti | kecittu atra kṣāraśabdena sajjīkṣārādikaṃ paṭhanti | tadatrāgrāhyam , godhūmaprabhṛtīnāṃ mahatā prayāsena śrāddhadravyatvenopapāditatvāt , tasmādanyatra sajjīkṣārādikaṃ lavaṇa matra sāmudraṃ saindhavaṃ vā grāhyaṃ na kṛtrimaṃ grāhyam | tathā ca brahmāṇḍapurāṇe— “sāmudraṃ saindhavaṃ caiva prakṛtyā havirucyate | pavitre parame hote pratyakṣe api sarvadā” iti | pratyakṣavacanaṃ pavitratvapratipādanārthaṃ na punardānāya, dānaṃ caudanādinā saṃmiśrasyaiveti | ādityapurāṇe— “madhukaṃ rāmaṭhaṃ caiva karpūraṃ maricaṅguḍam | śrāddhakarmaṇi śastāni saindhavaṃ tripusaṃ tathā” iti | tripusaśabdena kaścitsaṃskārako dravyaviśeṣaḥ | rāmaṭhaṃ hiṅgu | “yatkiñcinmadhunā miśraṃ gokṣīraṃ ghṛtapāyasam | dattamakṣayamityāhuḥ pitaraḥ pūrvadevatāḥ” iti | atra dadhyādikaṃ mahatā prayāsenāpi gavyamevopādeyam, tadasambhave māhiṣam | trikāṇḍamaṇḍanaḥ— “ghṛtārthe goghṛtaṃ grāhyaṃ tadabhāve tu māhiṣam | ājaṃ vā tadlābhe syāt iti śāstraviniścayaḥ” iti