Nrisimhaprasada p84.2

p84.2

haviṣyamityanenaivāyojyasya smṛtyantaraprasiddhakodravamasūracaṇaka kulittha pulaka niṣpāva rājamāṣa vārtāka bṛhatīdvayodakī vaṃśāṅkura pippalī vacā śatapuṣpoṣā vihala kṛtrimalavaṇa māhiṣacamarīkṣīra dadhi ghṛta kavakādīni niṣiddhāni | yānyatrāprasiddhāni dravyāṇi tāni vaidyakaśāstre draṣṭavyāni | krodhahetusambhave'pyakrodhanaḥ, atvaro'vyagraḥ | deyamātreḥ śabdāt yat kiṃciducchiṣyate taddadyāt | uccheṣaṇasya dāsavargabhāgitvāt | uccheṣaṇaṃ brāhmaṇeṣu visarjiteṣu nikṣepyaṃ bhūmau | “uccheṣaṇaṃ bhūmigatamajihmasyāśaṭhasya ca | dāsavargasya tat pitrye bhāgadheyaṃ pracakṣate” iti manuḥ (3246) atha śrāddhe varjyadravyāṇi | tatra vyāsaḥ“aśrāddheyāni dhānyāni kodravāḥ pulakāstathā | hiṅgurdravyeṣu śākeṣu kālānalaśubhāstathe”ti || kodravāḥ kodūṣakāḥ | pulakāḥ, chāndaso'tra madhyāttaradīrghābhāvaḥ | saṃskāradravyeṣu hiṅgudravyamaśrāddheyam | kālaḥ kṛṣṇāñjanaḥ, analaścitrakaḥ, śubhāḥ śumbhākhyaḥ śākaviśeṣaḥ | etāni śākādīni na śrāddheyāni | nanu— "madhukaṃ rāmaṭhaṃ caiva karpūraṃ marīcaṃ guḍam | ityādityapurāṇe hiṅgu dravyasya śrāddheyatā atrāśrāddheyatā ato virodhaḥ parasparam | atrābhidhīyate--atirātre ṣoḍaśinaṃ gṛhṇāti nātirātre ṣoḍaśinaṃ gṛhṇātīti vākyavihitayoḥ ṣoḍaśigrahaṇagrahaṇayoriva vikalpa iṣyate | tathā viṣṇupurāṇe— "śrāddhe na deyā pālaṅkyā tathā niṣpāvakodravau | masūra kṣāra vārttāka kulattha śaṣa śigravaḥ" iti || kṣāro yava kṣārādiḥ | bharadvājaḥ— "mudgāḍhakīmāṣavarjaṃ vidalāni dadyāt" iti || mudgaḥ kṛṣṇotaro māṣaḥ kulatthānupalakṣayati |