Prataparka 13.p1

13.p1

tatra caitrapūrṇimāyāṃ viśeṣo vāyavīye-"saṃvatsarakṛtācāyāḥ sāphalayāyākhilān surān | damanenārcayeccaitryāṃ viśeṣeṇa sadāśivam ||" iti | atra svīyatithyā samuccaya iti kecit | svīyatithāvakaraṇe'tra pūjetyanye dīkṣitaḥ taditaraviṣayatvena vyavasthetyapare meṣasthe ravau yā'māvāsyā na sā'māvāsyānte yasyeti cāndraviśeṣaṇamudante candre yā paurṇamāsī sā caitrī | etatkrameṇānyā api taduktaṃ haradattena-"meṣādisthe savitari yo yo darśaḥ pravartate | cāndrā māsāstadantāścaitrādyā dvādaśasmṛtāḥ || teṣu yā paurṇamāsī sā caitrādisaṃjñayā matā | kadācitkena yogena nakṣatrasyeti nirṇayaḥ ||" iti | iyaṃ mandādivāreṇayuktā'ti praśastetyuktaṃ brahmapurāṇe-"maṃde vārke gurau vāpi vāreṣveteṣu caitrikī | tatrāśvamedhikaṃ puṇyaṃ dānena labhate naraḥ | dānamakṣayatāṃ yāti pitṝṇāṃ tarpaṇantathā ||" iti | mahācaitryādi lakṣaṇamuktaṃ gārgyeṇa "māsasaṃjñe yadā ṛkṣe caṃdraḥ sampūrṇamaṇḍalaḥ | guruṇā yāti saṃyogaṃ sā tithirmahatī smṛteti ||" śāṃkaragītāyām "ekarāśigatau kāle yadā guruniśākarau | sā paurṇamāsī mahatī sarva sarvapāpaharā smṛtā ||" tathā-"paurṇamāsīṣu sarvāsu māsarkṣasahitāsu ca | dattānāmiha dānānāṃ phalaṃ daśaguṇaṃ bhavet ||" iti | iyaṃ manvādirapi | atrāpi vaiśākhasnānārambha ityuktaṃ prāk | atha vaiśākhī, tatra jābāliḥ--