Smriticandrika 14.p13

14.p13

lābhe mūlaphalairadbhirvā sahānnenottarāstarpayanti' iti | uttarā mūlaphalāpaḥ, tāssahaiva kiñcidannena māsaṃ tarpayanti, na kevalā ityarthaḥ | mārkaṇḍeyopi— godhūmairikṣubhirmudgaissatīnaiścaṇakairapi | śrāddheṣu dattaiḥ prīyante māsamekaṃ pitāmahāḥ || satīnāḥ kalāyāḥ 'kalāyastu satīnakaḥ' ityamaraḥ | caṇakaḥ vartulākāraścaṇakaḥ caṇakaśabdenaiva prasiddhaḥ harimanthakākhyaḥ, 'caṇako harimanthakaḥ' iti tenaivābhidhānāt | godhūmādivikārairanyaiḥ śrāddheṣu dattairekaṃ māsaṃ prīyanta ityarthaḥ | ataeva 'haritamudgakṛṣṇamāṣaśyāmākapriyaṅgugodhūmekṣuvikārāṃśca dadyāt' iti pracetasoktam | dadyāt māsaparyantaṃ pitṛtṛptaye iti śeṣaḥ| evaṃ ca na sākṣādgodhūmādayo deyāḥ, kiṃtu tadvikārā maṇṭakādayaḥ | viṣṇurapi—'śākaśyāmākanīvārapriyaṅgumudgairmāsaṃ prīyante' iti, mārkaṇḍeyastu māsaparyantaprītijanakāni śākāni prapañcayati— vidāryā cāvarūḍhaiśca bisaiśśṛṅgāṭakaistathā | kecukaiśca tathā kandaiḥ karkandhūbadarairapi || pālevatairārukaiścāpyakṣoṭaiḥ panasaistathā | kākolaiḥ kṣīrakākolaistathā piṇḍālukaiśśubhaiḥ || lājābhiśca sadhānābhiḥ trapuṣorvārubhirbhidaiḥ | sarṣapārājaśākābhyāmiṅgudai rājajambubhiḥ | priyāḷāmalakairmukhyaiḥ phalugubhiśca hyalābukaiḥ | vetrāṅkuraistālakandaiścukrikākṣīrikāplavaiḥ || mocaissamocairlakucaistathā vai bījapūrakaiḥ | muñjātakaiḥ padmaphalairbhakṣyabhojyaissusaṃskṛtaiḥ || rāgaṣāḍabacoṣyaiśca trijātakasamanvitaiḥ | dattaistu māsaṃ prīyante śrāddheṣu pitaro nṛṇām