Smriticandrika 17.p21

17.p21

nenoddhārābhyanujñāvagamāt | yattu devalenoktaṃannapānakaśītodaṃ dadadbhiravalokitaḥ | vaktavye kāraṇe saṃjñāṃ kurvan bhuñjīta pāṇinā || iti | apekṣānusāreṇānnapānaśītalavāryādidātṛbhirapekṣāṃ jñātumavalokitaḥ śrutpipāsādilakṣaṇe apekṣādeḥ kāraṇe vaktavye pāṇinā saṃjñāṃ saṅketaṃ apekṣādisūcakaṃ kurvan bhuñjīteti tasyārthaḥ pratyettavyaḥ | na tu svādutvādihavirguṇarūpe apekṣākāraṇe saṃjñāṃ kurvanniti, evaṃvidhārthaparigrahe pūrvoktavacanavirodhāpatteḥ | annapānadātrā tu havirguṇapraśno'tyarthaṃ doṣatvānna kārya ityāha śaṅkhaḥśrāddhe niyuktān bhuñjānānna pṛcchellavaṇādiṣu | ucchiṣṭāḥ pitaro yānti pṛcchato nātra saṃśayaḥ || dātuḥ patati bāhurvai jihvā bhoktuśca bhidyate | iti | lavaṇādiṣu nyūnādhikyābhāvena haviṣaḥ sāṅguṇyaṃ punarapi pradānārthaṃ na pṛcchet | na ca pṛṣṭvā samyaktvena jñātaṃ dadyāt, ‘dātuḥ patati bāhuḥ’ iti doṣaśravaṇāt | ‘jihvā bhoktuśca bhidyate’ iti nindābalāddhaviṣssāṅguṇyaṃ saṅketenāpi bhoktā na sūcayediti niṣedhavidhirgamyate | pādukayorupaviṣṭapīṭhe vā pādau nidhāya na nimantritā aśnīyurityāha viṣṇuḥ-‘aśrīyurbrāhmaṇā na sopānatkāḥ na pīṭhopari nihitapādāḥ’ iti | atra dvitīyaniṣedhātikrameṇa yo bhuṅkte tasya doṣamāha vṛddhaśātātapaḥāsane pādamāropya yo bhuṅkte dvijasattamaḥ | hanti daivaṃ ca pitryaṃ ca tadannaṃ ca prajāḥ paśūn