Smriticandrika 19.p40

19.p40

bhājaneṣu ca tiṣṭhatsu svasti kurvanti ye dvijāḥ | taddattamasurairbhuktaṃ nirāśāḥ pitaro gatāḥ || tasmāt svastivācanātprāk pātracālanamavaśyaṃ kāryamityabhiprāyaḥ pātracālanakartṛviṣaye vidhipratiṣedhau jātūkarṇyena darśitau-pātrāṇyuccālayecchrāddhe svayaṃ śiṣyo'thavā sutaḥ | na strībhirna ca bālena nāsajātyā kathañcana || svastivācanaprakārastu pāraskareṇa darśitaḥ--'svastīti bhagavan brūhīti vācanam' iti | akrīdakaṃ datvā svastivācanamiti kātyāyanenokto viśeṣaḥ | atraivaṃ prayogaḥ--yajñopavītī vaiśvadaivikahaste udakaṃ datvā purūravārdravasaṃjñikebhyo viśvebhyo devebhyassvastīti bhagavan brūhīti kartā brūyāt | vipreṇa ca tebhyaḥ svastīti vaktavyam | prācīnāvītī pitryabrāhmaṇahasteṣūdakaṃ datvā pitṛbhyaḥ pitāmahebhyaḥ prapitāmahebhyaḥ amukagotrebhyaḥ amukaśarmabhyaḥ svastīti bhagavan brūhīti kartā brūyāt | vipreṇa ca tebhyaḥ svastīti vaktavyam | evaṃ mātāmahādibrāhmahasteṣūdakaṃ datvā mātāmahamātuḥpitāmahamātuḥprapitāmahebhyo'mukagotrebhyo'mukaśarmabhyaḥ svastīti bhagavan brūhīti kartā brūyāt | vipreṇa ca tebhyassvastīti vaktavyam | svastivācanānantaraṃ yājñavalkyaḥ-- 'tataḥ kuryādakṣayyodakameva ca' iti | tatassvastivācanānantaraṃ akṣayyodakaṃ kuryāt | akṣayyamastvityuktvā viprahaste jalaṃ ninayedityarthaḥ | pitryaviprahaste tu satilaṃ jalaṃ ninayet | akṣayyamastviti ca tilodakaṃ datveti kātyāyanenoktatvāt | astvakṣayyamiti viprairvācyam | tathāca mārkaṇḍeyapurāṇam-pitṝṇāṃ nāmagotreṇa jalaṃ deyamanantaram | brāhmaṇānāṃ dvijairvācyamakṣayyamidamastviti