Smriticandrika 67.p151

67.p151

srāve mātustrirātraṃ syātsapiṇḍāśaucavarjanam | iti | trirātramiti brāhmaṇavarṇābhiprāyaṃ, rājanyādeścatūrātrāderuktatvāt | yattu sumantunoktaṃ — 'garbhamāsatulyā divasā garbhesraṃsane sadyaśśaucaṃ ca' iti, taccaturthamāsaviṣayam | vyavasthitavikalpaścāyam | evaṃcāyamarthaḥ—garbhasraṃsane caturthe māsi garbhasrāve mātuścatūrātramāśaucaṃ, sapiṇḍapuruṣasya snānātsadyaśśaucamiti | tathāca vṛddhavasiṣṭhaḥ— 'garbhasrāve māsatulyā divasāḥ strīṇāṃ snānamātrameva puruṣasya īṣatkaṭhinagarbhasrāve tu trirātram' iti, etat caturthamāsajātagarbhasrāvaviṣayamiti vyaktaṃ, māsāntare īṣatkāṭhinasrāvāsaṃbhavāt | asya vacanasyāyaṃ tātparyārthaḥ— caturthe māse mṛdutayā īṣatkaṭhinatayā vā garbhasrāve mātustrirātramāśaucaṃ, sapiṇḍapuruṣasya mṛdutayā srāve sadyaśśaucaṃ, kaṭhinatayā srāve trirātramāśaucamiti | puruṣagrahaṇādatra sapiṇḍastrīṇāṃ nāśaucaṃ, kintu puruṣasyaikavacanātpitustrirātramāśaucam | yattu marīcinā sapiṇḍastrīpuṃsasādhāraṇyena trirātramuktaṃ--pāte māturyathāmāsaṃ pitrādīnāṃ dinatrayam | iti, yacca vasiṣṭhena--'garbhasya patane sapiṇḍānāṃ trirātram' iti, tat pañcamaṣaṣṭhamāsapātaviṣayaṃ, māsāntare garbhapātāsaṃbhavāt | tātparyārthastu--pañcame māsi garbhapāte mātuḥ pañcarātramāśaucaṃ, ṣaṣṭhe ṣaḍrātraṃ, pitrādīnāṃ sapiṇḍānāṃ tu māsadvaye'pi trirātramiti | yattūktaṃ yamena— ajātadante tanaye śiśau garbhacyute tathā | sapiṇḍānāṃ tu sarveṣāmahorātramaśaucakam