Smritiviveka 8.1-3

8.1-3

atha ajāvyādivadhaprāyaścittam
tatra kāśyapaḥ | ajāvikabadhe trirātraṃ caurye hiraṇyaṃ
dadyāt vastraṃ vā | etadajñānataḥ atyantadhārmikabrāhmaṇakarttṛke sakṛdvadhe veditavyamiti dharmmadīpaḥ| jñānatastu cyavanaḥ
grāmyapaśuvadhe prājāpatyaṃ caret hiraṇyaṃ dakṣiṇā mṛgavadhe
prājāpatyārddhaṃ tiladroṇañca dadyāt| etaddānaṃ śaktasya | hiṃsāyāṃ
dānameva mukhyaṃ prāyaścittamityuktatvāt śaktasya tu manunā ajameṣāvanaḍvāhaṃ kharaṃ hatvā ekahāyanam ityekahāyanavṛṣadānamuktam | tathā dadyādityanuvṛttau śaṅkhalikhitau| ajāvikavadhe dhenumiti tadetayorvikalpaḥ dānāśaktasyābhyāsātyantābhyāsayostu grāmyāraṇyānāṃ paśūnāṃ hiṃsāsaṃkīrṇakaraṇamityuktā
viṣṇuḥ,
saṃkīrṇakaraṇaṃ kṛtvā māsamaśnīta yāvakam
kṛcchrātikṛcchramathavā prāyaścittaṃ tu kārayet
grāmyāraṇyapaśuviveke paiṭhīnasiḥ | grāmyāraṇyāścaturdaśaḥ gauravirajo'śvo'śvataro gardabho manuṣyaśceti sapta grāmyāḥ paśavaḥ
mahiṣavānaraṛkṣasarīsṛparurupṛṣatamṛgāśceti saptā'raṇyāḥ paśavaḥ
gomanuṣyahiṃsāyā upapātakatvāt taditarapaśuhiṃsāyāmitat
draṣṭavyam aśvāyāṃ gardabhena jāto'śvataraḥ