Kalanirnaya (Kalamadhaviya) 12.p28

12.p28

kintūdaya-samā tato nyūnā vā, dvayorapi pakṣayoddvādaśī paredyurudaye samā nyūnā'dhikā vā bhavati, tatra sarvatra śuddhaikādaśī upoṣyā na tvaviddhāṃ vaiṣṇavīṃ dvādaśīmupavasedityarthaḥ | evañca sati, prakṛte dvādaśyādhikye'pi ekādaśīsamanyūnayoranyataratvāt prathamaivopāyyetyuktambhavati | ubhayādhikye paredyurupavāsogāruḍapurāṇe darśitaḥ, — “sampūrṇaikādaśī yatra prabhāte punareva sā | tatropoṣyā parā puṇyā paratodvādaśī yadi”—iti | varāhapurāṇe'pi, — “ekādaśī viṣṇuṇā cet dvādaśī parataḥ sthitā | upoṣyā dvādaśī tatra yadīcchetparamaṃ padam”—iti | smṛtyantare'pi, — “sampūrṇaikādaśī yatra prabhāte punareva sā | vaiṣṇavī cet trayodaśyāṃ ghaṭikaikā'pi dṛśyate || gṛhastho'pi parāṃ kuryāt pūrvāṃnnopavaset sadā | pūrṇā'pyekādaśī tyājyā varddhate dvitayaṃ yadi”—iti | evamekaikādhikye dvitayādhikye'pi nirṇayeodarśitaḥ | anubhayādhikye tu nāsti sandehaḥ | iti śuddhāyāścatvārobhedāvyavasthitāḥ | atha viddhāyāścatvārobhedāvyavasthāpyante | tatrāpyekādaśyādhikye pūrvavat gṛhiyatyorvyavasthā draṣṭavyā | tadāha pracetāḥ,— “ekādaśī vivṛddhā cecchukle kṛṣṇe viśeṣataḥ | uttarāntu yatiḥ kuryāt pūrvāṃmupavaset gṛhī”—iti