Kalanirnaya (Kalamadhaviya) 12.p44

12.p44

niṣphalantu bhavettatsyāyat karoti vratādikam”—iti | ādiśabdādalaṅkāra-gandha-puṣpa-dhūpāñjanānāmupasaṃgrahaḥ| tadāha manuḥ,— “puṣpālaṅkāravastrāṇi gandhadhūpānulepanam”—iti | patyuranumatyā tu patnī vratādiṣvadhikāriṇī bhavati| tadāha kātyāyanaḥ,— “bhāryā patyurmatenaiva vratādīnācaret sadā”—iti | śuklāmevetyevakāraḥ kṛṣṇaikādaśyāmupavāsa-niṣedha-paraḥ | tathā ca kūrmapurāṇe,— “saṅkrāntyāṃ kṛṣṇapakṣe ca ravi-śukra-dine tathā | ekādaśyāṃ na kurvīta upavāsañca pāraṇam”—iti | gautamo'pi,— “āditye'hani saṃkrāntyāmasitekādaśīṣu ca | vyatīpāte kṛte śrāddhe putrī nopavaset gṛhī”—iti | atra, putrīti viśeṣaṇaṃ putravatodoṣa-viśeṣa-pradarśanārtham | tathā ca padmapurāṇe,— “saṃkrāntyāmupavāsena pāraṇena yudhiṣṭhira | ekādaśyāñca kṛṣṇāyāṃ jyeṣṭhaḥ putrovinaśyati”—iti | nāradīye'pi,— “indukṣayārkasaṃkrāntyorekādaśyāṃ sitetare | upavāsaṃ na kurvīta yadīcchet santatiṃ dhruvām”—iti | atra, saṃkrāntyādiṣūpavāsasya niṣedhaḥ saṃkrāntyādi-nimittakasya | tathā ca kātyāyanaḥ,—