Kalanirnaya (Kalamadhaviya) 14.p5

14.p5

“ṣaṣṭhyekādaśyamāvāsyā pūrvva-viddhā tathā'ṣṭamī | pūrṇimā para-viddhā ca nopoṣyāntithi-pañcakam”—iti | pūrvva-viddhā-grāhyatvañca yugmavākye “caturdaśī ca pūrṇimā”—iti | evaṃ paraspara-virodhe sati yā vyavasthā, sā brahmavaivartte darśitā,— “pūrvva-viddhā na karttavyā amāvāsyā ca pūrṇimā | varjayitvā muniśreṣṭha, sāvitrī-vratamuttamam”—iti || sāvitrī rāja-kanyā, tayā cīrṇaṃ vrataṃ sāvitrī-vratam | tacca bhaviṣyottarapurāṇe darśitam,— “kathayāmi kula-strīṇāṃ mahimovarddhanaṃ param | yathā cīrṇaṃ vrataṃ pūrvaṃ sāvitryā rāja-kanyayā”—iti || etacca paurṇamāsyāmamāvāsyāyāṃ ca vihitam | tasmin vrate pūrvvaviddhā grāhyā, vratāntare pūrvva-viddhā na karttavyā, kiṃ tu para-viddhaiva karttavyeti paraspara-viruddhasya śāstra-dvayasya vyavasthā | yadā tu caturhaśyaṣṭādaśanār̤ikā bhavati, tadā sāvitrīvratamapi tatra parityājyam | “bhūto'ṣṭādaśanār̤ībhirdūṣayatyuttarāntithim”—iti smṛteḥ | yo'yaṃ paurṇamāsī-nirṇayaḥ, saevāmāvāsyāyāmapyavagantavyaḥ | tatrāpi sāvitrī-vrataṃ pūrvva-dine karttavyaṃ vratāntarāṇyuttaradine | asyāñca vyavasthāyāṃ brahmavaivartta-vacanaṃ pūrvvamudāhṛtam | skandapurāṇe'pi,— “bhūta-viddhā sinīvālī na tu tatra vratañcaret | varjayitvā tu sāvitrī-vrataṃ tu śikhivāhana”—iti || evaṃ ca sati, yugma-śāstraṃ sāvitrīvrata-vyatirikteṣu vrateṣu draṣṭavyam | pracetāapi,— "nāga-viddhā tu yā ṣaṣṭhī saptamyā ca yutā'ṣṭamī | daśamyekādaśī viddhā trayodaśyā caturdaśī || bhūta-viddhā'pyamāvāsyā na grāhyā muni-puṅgavaiḥ | uttarottara-vidvāstāḥ karttavyāḥ kāṭhakī śrutiḥ- iti