Kalanirnaya (Kalamadhaviya) 7.p5

7.p5

tathāhi| tāṇḍiśākhāyāṃ śrūyate | “oṃmityetadakṣaramudgīthamupāsīta”—iti | asyāyamarthaḥ | pañca-bhakti-yuktasya sāmna udgīthākhyā bhaktiḥ kaścidavayavaḥ, taṃ cāvayavamudgātā yāgakāle gāyati | gīyamānantamudgīthaṃ saevodgātā tāṇḍiśākhāgatopaniṣaddihitairanekairguṇerupāsīteti | te ca guṇāstāṇḍiśākhāyāmeva vihitāḥ| udgīthabhaktistu tāṇḍi-śārdūla-jaiminīya-talavakārādiṣu sarvāsu sāmaśākhāsu paṭhitā | tatra, yadidantāṇḍiśākhokta-guṇamupāsanaṃ, tat kiṃ tāṇḍiśākhā-gataevodgīthaviśeṣe vyavatiṣṭhate, kiṃvā sarvaśākhā-gataudgīthasāmānye sañcaratīti saṃśayaḥ | tatra, sannidhi-vaśādudgītha-viśeṣe vyavatiṣṭhate,—iti pūrvaḥ pakṣaḥ| udgītha-śabdomukhyayā vṛttyodgītha-sāmānyaṃ brūte | na ca sannidhinā pañcama-pramāṇena prathama-pramāṇasya śruteḥ saṅkocoyuktaḥ | tasmādupāsanamudgītha-sāmānye sañcaratīti siddhāntaḥ | anena nyāyena prakṛte'pi sāhacaryākhyena sannidhinā dvitīyādi-śruteḥ saṅkocāyogādyugmādi-śāstraṃ pakṣa-dvaya-viṣayaṃ draṣṭavyam| yadi ca caturdaśīpūrṇimayoḥ kṛṣṇa-pakṣa-viṣayatvaṃ na sambhāvyate, tarhi tatraikatra śukla-pakṣaviṣayatvamastu | tathā, darśa-pratipadyugmamapi gatyantarābhāvāt pakṣa-dvayasandhi-viṣayam | evaṃ vyavasthitāai satyāṃ yugma-śāstreṇa pakṣa-dvaye'pi caturthī paravidvaiva prāpnoti | nanu, vacanāntareṇa caturthī-dvayasya vyavasthā pratīyate | tathā ca mārkaṇḍeyapurāṇe ,—