Nirnayakautuka 2.p56

2.p56

bhādrakṛṣṇacaturdaśyāṃ viṣaśastraśvāpadāhitiryagbrāhmaṇavidyudagninakhidaṃṣṭriśṛṅgibhirhatānāṃ jalodvandhanavṛkṣārohaṇairgrahabhūtādyāveśena mṛtānāṃ mahāprasthānānaśanābhyāṃ vidhito'pi mṛtānāṃ yuddhamṛtānāṃ ca pitṛbhrātṛputrādīnāṃ strīṇāmapi śastrādihatānāṃ śrāddhaṃ kāryam | prāyaścittārthavihitajalāgnyādikṛtamaraṇayuktānāmasādhyavyādhyādyabhibhūtatvādagnipraveśādimṛtānāṃ ca narāṇāṃ bhartṛ maraṇanimittavahnipraveśena mṛtānāṃ prasavādimṛtānāṃ ca strīṇāṃ śrāddhaṃ na kāryam | atra śastrahatasyeva caturdaśyāmiti niyamaḥ | na tu caturdaśyāmeva śastrahatasyeti | vārṣikādīnāmakaraṇāpatterdināntareṣvapi sāmānyavacanaprāptasyāparapakṣaśrāddhasya bādhakābhāvena nivarttayitumaśakyatvācca | idaṃ ca śrāddhaṃ pitrādīnāmapyekoddiṣṭameva sadaiva kāryam | pitṛmātrāditrayyāṃ dvayoḥ śastrādinā mṛtāvekoddiṣṭadvayaṃ tantreṇa kāryam | yasya tu pitrādi trayo'pi śastrādihatāstena caturdaśyāṃ pārvaṇameva kartavyamiti candrikākārāparārkahemādriprabhṛtayaḥ | mādhavastu tatraikoddiṣṭatrayamevetidevasvāmimatameva samarthitavān | asyāṃ śastrahataśrāddhe maghāsvapi piṇḍadānaṃ kāryam