Nirnayasindhu 19.2

19.2

atra sarvatra
tithinakṣatrayogādaro mukhyaḥ kalpaḥ | tadabhāve tu tithireva grāhyā | "tithiḥ śarīraṃ devasya
tithau nakṣatramāśritam | tasmāttithiṃ praśaṃsanti nakṣatraṃ na tithiṃ vinā " || iti vidyāpatilikhitavacanāt | “ tithinakṣatrayoryoge dvayorevānupālanam | yogābhāve tithirgrāhyā
devyāḥ pūjanakarmāṇi " iti tatraiva devalokteśca || atra ca patrīpraveśātpūrvedyuḥ sāyaṃkāle
ṣaṣṭhyabhāve tatpūrvadine'dhivāsanaṃ kāryam | sāyaṃkāletyantāsattve tvadhivāsanalopaḥ-"ṣaṣṭhyāṃ
sāyaṃ prakurvīta bilvavṛkṣedhivāsanam ' iti pūrvavacanāditi kalpataruḥ | sāyaṃ śrutiḥ phalātiśayamātrārthā | na tu karmalopa ityācāryyacūḍāmaṇiḥ
tatra pūjākramanirṇayaḥ
atra kramaḥ || bilvasamīpaṃ gatvā devīṃ bilvaṃ ca sampūjya prārthayet || tatra maṃtraḥ- "rāvaṇasya vadhārthāya rāmasyānugrahāya ca | akāle brahmaṇā bodho devyāstvayi kṛtaḥ purā
ahamapyāśritaḥ ṣaṣṭhyāṃ sāyāhne bodhayāmyataḥ | śrīśailaśikhare jātaḥ śrīphalaḥ śrīniketanaḥ || netavyosi samāgaccha pūjyo durgāsvarūpataḥ "