Nirnayasindhu 21.17

21.17

atha śaṃkhamantraḥ || “puṇyastvaṃ śaṃkha puṇyānāṃ maṅgalānāṃ ca maṅgalam | viṣṇunā vidhṛto
nityamataḥ śāntiprado bhava”
atha siṃhāsanamaṃtraḥ || “vijayo jayado jetā ripughātī śubhaṅkaraḥ | duḥkhahā dharmadaḥ
śāṃtaḥ sarvvāriṣṭavināśanaḥ || ete vai saṃnidhau yasmāttava siṃhā mahābalāḥ | tena sihāsaneti tvaṃ devairmantraiśca gīyase || tvayi sthitaḥ śivaḥ śāṃtastvayi śakraḥ sureśvaraḥ | namaste
sarvatobhadra bhadrado bhava bhūpateḥ || trailokyajayasarvasva siṃhāsana namostu te | tathaiva karmacihnāni svāni pūjyāni śilpibhiḥ || lohābhisārikaṃ karma kṛtvaivaṃ maṃtrapūrvakam | kṛtvā
niyamamaṣṭamyāṃ pūrvāhne snānamācaret || kuṃkumacaṃdanacampakacaturāmaiḥ śailapiṣṭaiśca | carcitagātrīṃ devīṃ kusumairabhyarcayedbahubhiḥ || kumudaiḥ sapadmapuṣpaiḥ sadhūpadīpaiḥ sanaivedyaiḥ | māṃsairbalyupahārairmaṅgalaśabdaiḥ samucchalitaiḥ || vihitacchatrairyānaiḥ syandanāsitaśastradhārijanalokaiḥ | tuṣṭaiḥ
paśvannādi ca nivedyate sarvameva bhagavatyai || durgā sā pūjanīyā ca taddine droṇapuṣpakaiḥ | tataḥ khaṅgaṃ namaskṛtya śatrūṇāṃ vadhasiddhaye || iccheta vijayaṃ rājyaṃ subhikṣaṃ
cātmane nṛpaḥ | punaḥpunaḥ praṇamyāryāṃ saṃsmaranhṛdaye śivām || sarvaṃ kṛtveti kauravya
aṣṭamyāṃ jāgaraṃ niśi | naṭanartakagītaiśca kārayecca mahotsavam || evaṃ hṛṣṭairniśāṃ nītvā
prabhāte aruṇodaye | ghātayenmahiṣānmeṣānagrato natakaṃdharam || śatamardhaśataṃ vāpi
tadardhaṃ vā yathecchayā | surāsavadhṛtaiḥ kumbhaistarpayetparameśvarīm || kāpālikebhyastaddeyaṃ
dāsīdāsajane tathā | tato'parāhnasamaye navamyāṃ vai rathe sthitām || bhavānīṃ bhrāmayedrāṣṭre svayaṃ rājā saśabdavān | kaścinnopoṣito vīro vidhṛto'nyena khaṅgavān
bhūtebhyastu baliṃ dadyānmaṃtreṇānena sāmiṣam | saraktaṃ sajalaṃ cānnaṃ gandhapuṣpākṣatairyutam || trīṃstrīnvārānsamūhena digviṃdikṣu kiredbalim ”