Nirnayasindhu 24.3-4

24.3-4

anyepi niyamāḥ
prāguktāḥ
tatra grāhyadhānyanirṇayaḥ
grāhyamuktaṃ skānde- “vrīhayo yavagodhūmāḥ priyaṃgutilaśālayaḥ | ete hi sāttvikāḥ proktāḥ
svargamokṣaphalapradāḥ ||” kāśīkhaṇḍe - "ūrje yavānnamaśnīyāddevānnamatha vā punaḥ | vṛṃtākaṃ
sūraṇaṃ caiva śukāṃśaṃvīśca varjayet ||” pṛthvīcandrodaye pādme-‘norjo vandhyo vidhātavyo
vratinā kenacitkvacit’ || tathā nāradīye-“avratena kṣipedyastu māsaṃ dāmodarapriyam
tiryagyonimavāpnoti nātra kāryā vicāraṇā ||” anyānyapi tāmbūlatailakeśakartanādivarjanasaṃkalparūpāṇi prāguktāni
ākāśadīpaḥ
tathā kārttike ākāśadīpa ukto nirṇayāmṛte puṣkarapurāṇe-“tulāyāṃ tilatailena sāyaṅkāle samāgate | ākāśadīpaṃ yo dadyānmāsamekaṃ hariṃ prati || mahatīṃ śriyamāpnoti rūpasaubhāgyasampadam” iti || tadvidhiśca hemādrāvādityapurāṇe-“divākarestācalamaulibhūte
gṛhāddūre puruṣapramāṇam | yūpākṛtiṃ yajñiyavṛkṣadārumāropya bhūmāvatha tasya mūrdhni | yavāṅgulacchidrayutāstu madhye dvihastadīrghā atha paṭṭikāsu | kṛtvā catasro'ṣṭadalākṛtīstu
yābhirbhavedaṣṭadiśānusārī || tatkarṇikāyāṃ tu mahāprakāśo dīpaḥ pradeyo dalagāstathāṣṭau
nivedya dharmāya harāya bhūmyai dāmodarāyāpyatha dharmarājñe || prajāpatibhyastvatha sapitṛbhyaḥ
pretebhya evātha tamaḥsthitebhyaḥ”