Nirnayasindhu 28.22

28.22

tatra strīsaṃsargavarjanam
atha strīsaṃsargavarjanamāha vasiṣṭhaḥ–“prabhūtadoṣe yadi dṛśyate tatpuṣpaṃ tadā śāntikakarma
kāryam | vivarjayedeva tadaikaśayyāṃ yāvadrajodarśanamuktamohi” jyotirnibandhe vasiṣṭhaḥ–
“ādyartau pauṣaśukrojaṃmadhuśucinabhasyāḥ kuyuktapāpavārā riktāmārkāṣṭaṣaṣṭhayaḥ pitṛparasadane
rātrisandhyāparāhne | miśrośrā mūlatīkṣṇaṃ vivaramanaruṇalpādhikāstraṃ garādyotpātaḥ pāpasya lagnaṃ na sadruṇajarannrīlaraktāmbaraṃ ca || ādyartau durbhagā nārī viṣkambhe cedrajasvalā
vandhyā caivātigaṇḍe ca śūle śūlavatī bhavet || gaṇḍe tu pum̐ścalī nārī vyāghāte cātmaghātinī | vajre ca svairiṇī proktā pāte ca patighātinī || parighe mṛtavandhyā ca vaidhṛtau
patimāriṇī | śeṣāḥ śubhāvahā yogā yathānāma phalapradāḥ ||”
tatra śāntinirṇayaḥ
śāntimāha prayogapārijāte śaunakaḥ-“sārtavānāṃ tu nārīṇāṃ śāntiṃ vakṣyāmi śaunakaḥ
pañcamehni caturthe vā grahayajñapuraḥsaram || droṇapramāṇadhānyena vrīhirāśitrayaṃ bhavet | kumbhatrayaṃ nyasedrāśau tantuvastrādiveṣṭitam || sūktenātha navarcena prasuva āpa ityatha | ṛcāyāḥ
pravatastadvadgāyatryā ca tataḥ kramāt || madhyakumbhe kṣipeddhānyamauṣadhāni ca hema ca | udumbaraḥ kuśo dūrvā rājīvavaṭavilvakāḥ || viṣṇukāntātha tulasī barhiṣaṃ śaṃkhapuṣpikā
śatāvaryahvagandhā ca nirguṇḍī sarṣapadvayam || apāmārga palāśaśca panaso jīvakastathā
priyaṃgavaśca godhūmā vrīhayo'śvattha eva ca || kṣīraṃ dadhi ca sarpiśca padmapatraṃ tathotpalam
kuraṇṭakatrayaṃ guṃjā vacābhadrakamustakāḥ || dvātriṃśadauṣadhānīha yathāsaṃbhavamāharet | mṛttikāścauṣadhādīni tanmantreṇa kṣipetkramāt || kumbhopari nyasetpātraṃ kāṃsyaṃ mṛdveṇutāmrajam
bhuvaneśvarīṃ nyasettatra indrāṇīṃ ca puraṃdaram || japedgāyatrīmāhomācchrīsūktaṃ ca japettataḥ
spṛśannavai dakṣiṇaṃ kumbhaṃ ṛtvigeko japedatha || catvāri rudrasūktāni caturmantrottarāṇi ca
saṃspṛśannuttaraṃ kumbhaṃ śrīsūktaṃ rudrasaṃkhyayā || śanna indrāgnisūktaṃ ca tatraiva saṃspṛśañjapet
kumbhasya paścime deśe śāntihomaṃ samācaret || dūrvābhistilagodhūmaiḥ pāyasena ghṛtena ca
tisṛbhiścaiva dūrvābhirekaikā cāhutirbhavet || aṣṭottarasahasraṃ vā śatamaṣṭottaraṃ tu vā | gāyatryaiva tu hotavyaṃ haviratra catuṣṭayam || tataḥ sviṣṭakṛtaṃ hutvā samudrādūrbhisūktataḥ | saṃtatāmājyadhārāntāṃ pūrṇāhutimathācaret || athā'bhiṣekaṃ kurvīta pratikumbhasthitodakaiḥ | āpohiṣṭheti navabhiḥ sūktena ca tataḥ param || indro aṅgatṛcenaiva pāvamānaiḥ krameṇa tu | ubhayaṃ
śṛṇavannainaṃ svastidāviśa ekayā || tryambakena mantreṇa jātavedasa ekayā | samudrajyeṣṭhā
ityādi trāyantāṃ ca tribhiḥ kramāt || imā āpastṛcenaiva devasyatveti mantrataḥ | mantreṇātha tamīśānaṃ tvamagne rudra ityatha || tamuṣṭuhīti mantreṇa pitaraṃ bhuvanasya hi | yāte rudreti
maṃtreṇa śivasaṃkalpamantrataḥ | iṃdra tvā vṛṣabhaṃ pañcamantraiścaivābhiṣecayet | dhenuṃ payasvinīṃ
dadyādācāryāya ca bhūṣaṇam || sadakṣiṇamanaḍvāhaṃ pradadyādrudrajāpine | mahāśānti prajapyātha
brāhmaṇānbhojayedatha