Nirnayasindhu 44.1-2

44.1-2

hemādrau śivadharme-“snānaṃ palaśataṃ jñeyamabhyaṅgaḥ pañcaviṃśatiḥ | palānāṃ dve sahasre tu mahāsnānaṃ prakīrtitam || pañcaviṃśatpalaṃ liṅge abhyaṅgaṃ kārayedatha | śivasya sarpiṣā snānaṃ proktaṃ
palaśatena ca || tāvatā madhunā caiva dadhnā caiva tataḥ punaḥ | tāvataiva ca kṣīreṇa gavyenaiva
bhavettataḥ || bhūyaḥ sārddhasahasreṇa palānāmaikṣaveṇa ca | rasena kārayetsnānaṃ bhaktyā coṣṇāṃbunā tataḥ || viṣṇvādau tu skānde-“kṣīrāddaśaguṇaṃ dadhnā ghṛtenaiva daśottaram || ghṛtāddaśaguṇaṃ kṣaudraṃ kṣaudrāccaikṣavarrja tathā”
brāhme-“devānāṃ pratimā yatra ghṛtābhyaṅgakṣamā bhavet | palāni tatra deyāni śraddhayā pañcaviṃśatiḥ || ” idaṃ kroḍīkṛtābhiprāyeṇa | tatraiva saṃgrahe-“viṣvaksenāya dātavyaṃ naivedyasya
śatāṃśakam | pādodakaṃ prasādaṃ ca liṅge caṇḍeśvarāya tu ||”
pañcāyatanasanniveśanirṇayaḥ
pañcāyatanasaṃniveśamāha bopadevaḥ padārthādarśaśca-“śaṃbhau madhyagate harīnaharabhūdevyo harau
śaṃkarebhāsyenāgasutā ravau haragaṇeśājāmbikāḥ sthāpitāḥ || devyāṃ viṣṇuharebhavaktraravayo
lambodare'jeśarenāmbāḥ śaṃkarabhāgato'tisukhadā vyastāstu hānipradāḥ