Nirnayasindhu 49.2-9

49.2-9

atha gṛhapraveśaḥ
bṛhaspatiḥ-“nandāyāṃ dakṣiṇaṃ dvāraṃ bhadrāyāṃ paścimena tu | jayāyāmuttaradvāraṃ pūrṇāyāṃ pūrvato
viśet ||” vasiṣṭhaḥ-“kṛtvā śukraṃ pṛṣṭhato vāmato'rkaṃ viprānpūjyānagrataḥ pūrṇakumbham | harmyaṃ
ramyaṃ toraṇasragvitānaiḥ strībhiḥ sragvī gītavādyairviśecca || vyavahāratattve-“saumyāyane
śrāvaṇamārgapauṣe janmarkṣalagnopacayodayaṃśe | vāmaṃ gate'rke gṛhavāstupūjāṃ kṛtvā viśeddeśmabhakūṭaśuddham ||”,
vāstuśāstre-“lagnātprāgādito dikṣu dvau dvau rāśī niyojayet | ekamekaṃ nyasetkoṇe sūrya
vāmaṃ vicintayet ||” vasiṣṭhaḥ-“candrajāryasitavāsareṣu ca śrīkaraṃ sutamahārthalābhadam
sūryasūnudivase sthirapradaṃ kiṃ tu caurabhayamatra nirdiśet ||” ratnakośe-“puṣye dhaniṣṭāmṛgavāruṇeṣu svāyaṃbhuvarṣe triṣu cottarāsu | akṣīṇacandre śubhade nṛpasya tithauvarikte ca gṛhapraveśaḥ ||” nāradaḥ-“praveśo madhyamo jñeyaḥ saumyakārttikamāsayoḥ ! māghaphālgunavaiśākhajyeṣṭhamāseṣu śobhanaḥ || akapātamanācchannamadattabalibhojanam | gṛhaṃ na praviśeddhīmānāpadāmākaro hi tat