Nirnayasindhu 60.2-2

60.2-2

” mādhavīye smṛtyarthasāre tulasī niṣiddhā
tulasīniṣedho nirmūla iti hemādriḥ || samūlatvepi piṇḍaparaḥ || “tulasīgandhamāghrāya
pitarastuṣṭamānasāḥ | prayānti garuḍārūḍhāstatpadaṃ cakrapāṇinaḥ” iti prayogapārijāte
pādmokteriti bopadevaḥ || vṛddhaparāśaraḥ-“na jātīkusumairvidvān vilvapatraiśca nārcayet
japādikusumaṃ jhiṇṭī rūpikāsakuraṃṭikā || puṣpāṇi varjanīyāni śrāddhakarmāṇi nityaśaḥ ||”
hemādrau śaṅkhaḥ-“ugragandhīnyagandhīni caityavṛkṣodbhavāni ca | puṣpāṇi varjanīyāni raktavarṇāni yāni ca || jalodbhavāni deyāni raktānyapi viśeṣataḥ ||” aṅgirāḥ-‘na jātikusumāni dadyānna kadalīpatram' iti jātyāṃ vikalpa iti hemādriḥ || niṣedhaḥ piṇḍaviṣayaḥ-“kundaṃ śaṃbhau ca no dadyānnonmattaṃ garuḍadhvaje | piṇḍe jātīṃ ca no dadyāddevīmarkeṇa nārcayet ||” iti vṛddhayājñavalkyokteriti vopadevaḥ
smṛtisāre-“āgastyaṃ bhṛṅgarājaṃ ca tulasīṃ śatapatrikā | campakaṃ tilapuṣpaṃ ca ṣaḍete
pitṛvallabhāḥ || ketakīṃ karavīraṃ ca bakulaṃ kundakaṃ tathā | pāṭalāṃ caiva jātīṃ ca śrāddhe
yatnena varjayet