Nirnayasindhu 73.p15

73.p15

mādhavīye hārītaḥ “yā tu pūrvamamāvāsyā mṛtāhāddaśamī bhavet || sapiṇḍīkaraṇaṃ tasyāṃ kuryādeva suto'gnimān || ” mṛtāhādūrdhvaṃ daśamī ekādaśītyarthaḥ || “ sapiṇḍīkaraṇaṃ kuryātpūrvavannāgnimānsutaḥ | parato daśarātrāccetkuhūrbde paretaraḥ” iti kārṣṇājinismṛteḥ || āhitāgnestena vinā śrautapiṇḍapitṛyajñāsiddheḥ || tadāha gālavaḥ-“ sapiṇḍīkaraṇātprete paitṛkaṃ padamāsthite | āhitāgneḥ sinīvālyāṃ pitṛyajñaḥ pravarttate”
madanaratne prajāpatiḥ-‘nāsapiṇḍyagnimān putraḥ pitṛyajñaṃ samācaret |' aparārke kātyāyanaḥ-“ ekādaśāhaṃ nirvartya pūrvaṃ darśādyathāvidhi | prakurvītāgnimānvipro mātāpitroḥ sapiṇḍatām” | āśaucāntaprathamadarśayormadhye kasmiṃścidahanītyarthaḥ || pitrādīnāṃ sapatnīkānāṃ
devatātvena māturapi prāgdarśātsapiṇḍanaṃ yuktamityaparārkaḥ || evaṃ pitāmahāderapi sapiṇḍanaṃ
prāgdarśātkāryam || tena vinā pārvaṇāyogād dvādaśāhe vā kāryam || “sāgnikastu yadā kartā
pretaścānagnimān bhavet || dvādaśāhe bhavetkāryaṃ sapiṇḍīkaraṇaṃ sutaiḥ” iti gobhilokteḥ
sāgneḥ pretasya tu tripakṣe-“pretaścedāhitāgniḥ syāt kartānagniryadā bhavet | sapiṇḍīkaraṇaṃ tasya
kuryātpakṣe tṛtīyake” iti sumantūkteḥ || madanaratne laghuhārītopi “anagnistu yadā vīra bhavetkuryāttadā gṛhī || pretaścedagnimāṃstu syāt tripakṣe vai sapiṇḍanam ||” dvayoḥ sāgnitve dvādaśāha
eva “sāgnikastu yadā karttā pretovāpyagnimānbhavet||dvādaśāhe tadā kāryaṃ sapiṇḍīkaraṇaṃ pituḥ|”
iti tenaivokteḥ || dvayoranagnitve tu bhaviṣye-“sapiṇḍīkaraṇaṃ kuryādyajamānastvanagnimān
anāhitāgneḥ pretasya pūrṇe'bde bharatarṣabha || dvādaśāhāni ṣaṇmāse tripakṣe vā trimāsi vā
ekādaśepi vā māsi maṅgalasyāpyupasthitau || ”