Nirnayasindhu 8.3-2

8.3-2

tathā-“niṣpāvān rājamāṣāṃśca masūraṃ sandhitāni ca | vṛntākaṃ ca kaliṅgaṃ ca supte
deve vivarjayet ||”
maunavratī bhavedyastu tasyājñāskhalitā bhavet || bhūmau bhuṃkte sadā yastu sa pṛthivyāḥ patirbhavet | pradakṣiṇāśataṃ yastu karoti stutipāṭhakaḥ || haṃsayuktāvimānena sa ca viṣṇupuraṃ
vrajet | ayācitena prāpnoti putrān dharmyānviśeṣataḥ || ṣaṣṭhānnakālabhoktā yaḥ
kalpasthāyī bhavediti | parṇeṣu yo naro bhuṃkte kurukṣetraphalaṃ labhet || guḍavarjī naro
dadyāttadgataṃ tāmrabhājanam | sahiraṇyaṃ naraśreṣṭha lavaṇasyāpyayaṃ vidhiḥ || supte deve tu yo
viṣṇoḥ śivasyāṅgaṇamarcayet | paṃcavarṇaistu yo nityaṃ svastikaiḥ padmakaistathā || sa
yāti rudralokaṃ hi gāṇapatyamavāpnuyāt”
vratānte dānanirṇayaḥ
athaiṣāṃ samāptau kārttikyāṃ dānāni | ekabhuktavrate daṃpatī saṃpūjya dhenurdeyā | nakte vastrayugam | ekāṃtaropavāse gauḥ | bhūśayane śayyā | ṣaṣṭhakālabhojane gauḥ | vrīhigodhūmādityāge
haimavrīhyādi | kṛcchre goyugmam | śākāśane gauḥ payovrate ca | dadhimadhughṛtavrateṣu vāso
gauśca | brahmacarye svarṇamūrtiḥ | tāmbūlavrate vāsoyugam | maune ghṛtakumbho vastrayugaṃ ghaṇṭā
ca || devāgre raṃgamālikakaraṇe dhenurhemapadmaṃ ca | dīpikāvrate dīpikā vāsoyugaṃ ca
bhūmibhojane parṇabhojane ca kāṃsyapātraṃ gauśca | catuṣpathadīpe gogrāse ca govṛṣau | pradakṣiṇāśate vastram | anukteṣu svarṇaṃ gauśca || ityādi hemādrau jñeyam | tathā ca bhārgavārcanadīpikāyāṃ pādme-"śayanībodhinīmadhye śamīdūrvāpāmārgakaiḥ | bhṛṃgarājena devāṃstu nārcayeta kadācana ||" hemādrau pādme-"āṣāḍhādicaturmāsānabhyaṅgaṃ varjayennaraḥ | samāptau ca
punardadyāttailatailayutaṃ ghaṭam || āṣāḍhādicaturmāsaṃ varjayennakhakṛntanam | vṛṃtākaṃ gṛñjanaṃ
caiva madhusarpirghaṭocitam || kārttikyāṃ tatpunarhemaṃ brāhmaṇāya nivedayet”