Smritisaroddhara 1.p30

1.p30

athāśvinaśuklapratipadi bhaviṣyottaroktamaśokavratam | aśokavṛkṣapūjā patākādibhiḥ brāhmaṇāya vṛkṣapratimādānaṃ tato bhojanam | phalaṃ śokanāśaḥ saubhāgyalābhaśca | ante gaurīpadaprāptiḥ | strīkartṛrkamidam | atha kārttikaśuklapratipat | sā ca pūrvayutaiva grāhyā, tithivṛddhau parā | taduktaṃ purāṇasamuccaye.-varddhamānatithau nandā yadā sārddhatriyāmikā | dvitīyā vṛddhagāmitvāduttarā tatra cocyate | tathācoktama—triyāmagā darśārtādharmaveccetsārddhatriyāmā pratipadvivṛddhau | dīpotsave te munibhiḥ pradiṣṭe ato'nyathā pūrvayute vidheye | nanu pūrvaviddhā prakarttavyā śivarātrivalerdinam, tathā-yā kuhūḥ pratipanmiśrā tatra gāḥ pūjayennṛpa | pūjanātrīṇi varddhante prajā gāvo mahīpatiḥ | iti pūrvayutāyā vidhānaṃ paraviddhāyā niṣedhaśca | yathāruḥ, nandāyā darśane rakṣā validānaṃsucaiva hi | bhadrāyāṃ gokulakrīḍā sadeśo vai vinaśyati | bhadrāyāṃ dvitīyāyām | devalopi-pratipaddarśasaṃyoge krīḍanaṃ tu gavāṃ matam | paraviddheṣu yaḥ kuryātputradāradhanakṣayaḥ | tathā-pratipadyadhikaraṇaṃ dvitīyāyāṃ gavārcanam | chatracchedaṃ kariṣyete vittanāśaṃ kulakṣayamityādivākyairvirodha iti cetsatyam | yasyāṃ pratipadi dvitīyāyuktāyāṃ candradarśanasambhāvanā tadviṣayatvānniṣedhavākyānāṃ na virodhaḥ | pratipadyapagahlātmikatrimuhūrttavyāpinyāṃ dvitīyāyāṃ candradarśanaṃ sambhāvyate | tadāhānvādhānaviṣaye śātātapaḥ-dvitīyā trimuhūrttā cet pratipadyāparāhvikī | anvādhānaṃ caturdaśīyāṃ parataḥ somadarśanāditi | aparāhnaśca pañcadhāvibhaktasyānhaścaturtho bhāgaḥ | ataśca yatra pratipadi ṣaṇmuhūrttavyāpinī dvitīyā tatra candradarśanasambhavādvo krīḍā na kāryā | taduktaṃ purāṇāmuccaye—gavāṃ krīḍādine yatra rātrau dṛśyeta candramāḥ | somorājā paśūnhanti surabhīpūjakāṃstathā | candradarśane tu tithervṛddhigamitvādvitīyāyuktaiva grāhyā | kiñca sārddhatriyāmā pratipadvṛddhāvityatra pratipadaḥ sārddhatriyāmavyāpitvena dvitīyāvedho'pyasaṃbhavī, vedhasya trimuhūrttātikrāntatvāt | tithivṛddhau pūrvaviddhāniṣedhācca paraviddhāprāptiḥ | taduktaṃ bhaviṣye | yathā dvādaśabhirmāsairmāso vṛddho malimlucaḥ | tathaitrāhorātravṛddhā tithiḥ proktā malimlucā | yathā malimlucaḥ pūrvī māso daivastathottaraḥ | tyājyā tithiratathā pūrvā grāhyā caiva tathottareti sarvathā dvitīyāsparśāniṣedhāgraho na yuktaḥ, tādṛśavākyāśravaṇāt | ataścandradarśanāsambhāvanāyāṃ pūrvāhne krīḍanaṃ gavāmiti bodhyam | karmakālavyāpitvāt | tithivṛddhau paraiva pratipadgokrīḍādau grāhyeti sarvamanavadyam | skandapurāṇe—prātargovardhanaḥ pūjyo dyūtaṃ cāpi samācaret | bhūṣaṇīyāstathā gāvaḥ pūjyāścāvāhadohanāḥ | avāhadohanāḥ vāhadohanarahitā | govardhanapūjāmantraḥ | govardhana dharādhāra gokulatrāṇakāraka | bahubāhukṛtocchrāya gavāṃ koṭiprado bhava | gopūla़āmantrau, lakṣmīryā lokapālānāṃ dhenurūpeṇa saṃsthitā | ghṛtaṃ vahati yajñārthe mama pāpavyapohatu | agrataḥ santu me gāvo gāvo me santu pṛṣṭhataḥ | gāvo me hṛdaye santu gavāṃ madhye vasāmyaham | skānde-tato'parāhnasamaye pūrvasyāṃ diśi bhārata | mārgapālīṃ prabadhnīyāddrostambhe