Smritisaroddhara 1.p63

1.p63

atha saptamīnirṇayaḥ | saptamī ca sarvā pūrvavidvaiva grāhyā yugmavākyāt | 'ṣaṣṭhyā yutā saptamī ca karttavyā tāta sarvadā | ṣaṣṭhī ca saptamī yatra tatra saṃnihito raviriti skāndāt | 'saptamī nāṣṭamī yuktā na saptamyā yutāṣṭamī | sarveṣu vratakalpeṣu aṣṭamī parataḥśubhā'iti brahmavaivarttaniṣedhācca | 'ṣaṣṭhyekādaśyamāvāsyā pūrvaviddhā tathāṣṭamī| saptamī paraviddhā ca nopoṣyamiti pañcakam' itiskandaniṣedhācca | bhaviṣye-ṣaṣṭhīsametā karttavyā saptamī nāṣṭamīyutā | pataṅgopāsanāyeha ṣaṣṭhyāmāhurupoṣaṇamiti vidheḥ ṣaṣṭhīyutā grāhyā | pataṅgaḥ sūryyaḥ | śivaviddho divākara itiniṣedhācca aṣṭamīyutā tyājyetyalaṃ prapañcena | gauḍāstu āśvinaśuklasaptamī devīpraveśādau dvitīyaiva grāhyā, tathāca bhaviṣyottare-yugādyāṃ varṣavṛddhiśca saptamī pārvatīpriyā | raverudayamīkṣante na tāsu tithiyugmateti | varṣavṛddhirjanmadinamiti vadanti, etasya vākyasya nirṇayāmṛtādiṣvadarśanāllolyate manaḥ | iti saptamīsāmānyanirṇayaḥ