Smritisaroddhara 1.p87.2

1.p87.2

kanyāṃ gate savitari śuklapakṣe'ṣṭamīyutā | mūlanakṣatrasaṃyuktā sā mahānavamī smṛtā | ābhyāmaṣṭamī navamyoryugmatvāsūcitā, mūlarkṣayuktāpi saptamīleśasahitā ced duṣṭaiva | yaduktaṃ durgotsave- mūlenāpi hi saṃyuktā sadā tyājyāṣṭamī budhaiḥ | leśamātreṇa saptamyā api syāddūṣitā yadi | devīpurāṇe-santarpayantī huṅkāraiḥ khaḍotkhātaparāparā | navamyāṃ pūjitā devī dadyādānandadaṃ phalam | sā puṇyā sā pavitrā ca sā dharmyā sukhadāyinī| tasyāṃ saṃpūjaniyā tu cāmuṇḍā muṇḍamālinī | rūpanārāyaṇīye-mūle saṃpūjayeddevī tathā saliladaivate | vaiśvadeve tu nakṣatre pūjitā duḥkhadā bhavet | vaiśvadeve uttarāṣāḍhāyām | uttarāṣāḍhāniṣedhaḥ sati sambhave | taduktaṃ-mūlābhāve ca karttavyā aṣṭamī toyasaṃyutā | viśvayuktā ca karttavyā aṣṭamī navamīyutā | toyaṃ pūrvāṣāḍhā, viśvamuttarāṣāḍhā | granthāntare viśeṣa uktaḥ, mūlenāgamanaṃ devyāḥ pūrvāṣāḍhāsu pūjanam | uttarāsu baliṃ dadyācchravaṇe cāparājitā | sūryodaye paraṃ riktā pūrṇā syādaparā yadi | balidānaṃ prakarttavyaṃ tatra deśe śubhāvaham | riktā navamī, pūrṇā daśamī | 'balidāne kṛte'ṣṭamyāṃ putrabhaṅgo bhavennṛpa' | tathā-aṣṭamyāmurite sūrye dinānte navamī bhavet | prabhāte balidānaṃ ca kiyanmātrāpilabhyate | navamyāṃ tatra saṃpūjyā durgā durgārttināśinī'| udayagāminyāmaṣṭamyāmavavāsapūjādikam | udayagāminyāṃ navamyāṃ balidānamiti paryavasitaṃ | nanvatra viruddhāni vākyāni śrūyante | tathāhi -ahaṃ bhadrā ca bhadrāhaṃ nāvayorantaraṃ kvacit | sarvasiddhi pradāsyāmi bhadrāyāmarcitā hyaham | bhadrāyāṃ bhadrakālyāśca madhye syādarcanakriyā |