Vyavaharamayukha 3.p258

3.p258

patraṃ vāhanam | vastrapatrālaṃkārā ye yena dhṛtāste tasyaiva samamūlyāścet | nyūnādhikamūlyāstu vibhājyā eva | pitṛdhṛtaṃ tu vastrādi tacchrāddhabhoktre deyam | vastrālaṃkāraśayyādi pituryadvāhanādikam | gandhamālyaiḥ samabhyarcya śrāddhabhoktre tadarpayet || iti bṛhaspatyukteḥ || viṣameṣvajādiṣu viśeṣamāha manuḥ ( 9. 119 ) ajāvikaṃ saikaśaphaṃ na jātu viṣamaṃ bhajet | ajāvikaṃ saikaśaphaṃ jyeṣṭhasyaiva vidhīyate || kṛtānnodake yathāsaṃbhavamupayojye | striyo dāsyo viṣamā yathāsaṃbhavaṃ karma kāraṇīyāḥ | samāstu vibhājyāḥ | pitravaruddhāstu samā api na vibhājyāḥ | strīṣu ca saṃsaktāsvavibhāgaḥ-iti gautamokteḥ (gau. dha. sū. 28. 45 ) | yogakṣemaśabdena mantripurohitādaya ucyanta iti kalpatarau | laugākṣistu kṣemaṃ pūrtaṃ yogamiṣṭamityāhustattvadarśinaḥ | avibhājye tu te prokte śayanāsanameva ca || ityāha | tatra pūrtaṃ taḍāgārāmādi | iṣṭaṃ yāgaviprabhojanādi | tadarthamavibhāgadaśāyāṃ sarvānumatyā yaddravyaṃ yenotsṛjya pṛthak sthāpitaṃ tena dravyeṇa sa dharmastenaiva kāryo nānyena na vā saṃbhūya sarvairityarthaḥ | pracāro gṛhādimārgaḥ gavādipracārārthā bhūśca || yattu śaṅkhalikhitau-na vāstuvibhāgo nodapātrālaṃkāropayuktavāsasām-iti yacca vyāsaḥ